Lungleia ram kan chhan chhui dawn

Lunglei District Disaster Management Authority (DDMA) chu nimin khan an chairman Kulothungan A hoin a pisaah an ṭhukhawm a; DDMA leh YMA Sub-Hqrs. hruaitute telin, Lungleia kângmei chhuak chungchang an sawiho. District hotute chuan, kângmei chhuah chhan chhui a nih dawn thu leh criminal case siam tum a nih thu an sawi.

Ṭhutkhawmah hian ram kâng ṭhelh mih thuai a nih theihna tura hmalak ṭulte an sawiho a; tui cháwi turin 2nd Battalion MAP tanker hman belh turin an ruahman a, kângmei ṭhelh turin Indian Air Force (IAF) ngen ni se, Mizoram sorkar hotute hnena thlen nghal ni se, an ti.

Ram kâng chu ṭhelh mih mai a beiseiawm loa a lan avangin Lunglei Fire Station thawktute pui turin Aizawla Fire & Emergency Services aṭangin kangṭhelh motor pahnih leh thawktu mi pasarih phei tura tih a ni.

Lunglei DDMA chuan, ram kâng ṭhelh tura veng hrang hrang aṭanga mi tlawmngai leh inpete leh mimal tui phurtute'n a thlawna an motor-te an hmantir avangin lawmthu an sawi.

Kângmei chhuak hi Lunglei additional DC M Misael leh SDC Collin Hlychho ten nimin khan a hmunah an tlawh a; kângmei chhuah chhan sorkarin a chhui dawn thu leh criminal case siam tum a nih thu an sawi.

M Misael chuan, kângmei inṭan dan uluk taka chhui mek a nih thu sawiin, "Remchang hmasa berah kângmei chhuahna veng VC leh YMA hruaitute ko khawmin ngun taka ngaihtuahho a ni ang. A ṭul angin criminal case-te pawh siam tum a ni," a ti a; DMR leh Home changtu minister Lalchamliana leh department hotu dangte nen phone hmanga an inràwn reng thu a sawi bawk.