Ruihhlo vanga YMA-in an man Vairengte damdawi-inah a thi

ranch YMA duty-te'n Mizorama ruihhlo tawlhrûk tum an man Intiaz Ali (48), Lailapur chu nimin chawhma 10:30 vel khan Vairengte damdawi-inah a thi. He thil thleng vang hian Lailapur-ah mipui an pungkhawm.

Vanglaini palai zawhna chháng­­in Kawngthar Veng YMA hruaitute chuan, ruihhlo inpe tur an awm tih thu an dawn bawh­zuiin ramhnuaiah an duty tih an sawi a, "Nimin (Pathianni)chawhnu dar 2-3 inkar vel khan ruihhlo an inpe tur kan hmu a, kan hual bet nghal. Lailapur lam aṭangin mi pahnih an lo kal a, min hmuh hnu­ah an tlanchhe nghal a ni," an ti.

Vairengte Kawngthar Veng YMA hruaitute sawi danin, Intyaz Ai chauh an man a, mi dangte chu an tlan bo hman a; tlan bo tate hian ruihhlo a keng tam zawk.

Vairengtea Excise & Narco­tics duty-te hnenah Intiaz Ali leh a ruihhlo ken heroin bagha cap 14 chu tlai dar 4:45 velah an hlan. Intiaz Ali chu nimin zing lamah a chauh deuh avangin Excise duty-te chuan Vairengte damdawi-in an panpui a, chawhma dar 10:30 velah a thi. Vairengte doctor-te chuan septicemia vanga thi-ah an ngai. He thuziah lai hian a ruang postmortem mek a ni.

Vanglaini palai zawhna chhangin nizan dar 6 vel khan Silchar Mizoram dy. resident commissioner Saizikpuii chuan he thil thleng vang hian Silchar-ah thil thleng duhawm lo an hriat loh thu sawiin, "Fimkhur thilah zirlai 30 vel chuan house an rawn pan," a ti a, Lailapur-ah erawh mipui an pung­khawm tih an dawn thu a sawi.

Hetihlai hian Assam DIG Southern Range Diley Dey chuan Assam lamah Intiaz Ali thih thu hi a puang a, Cachar SP leh Kolasib SP an inbiak thu a sawi bakah, mipuite chu buaina tichhuak lo turin a ngen.

Assam DIG chuan, "Cachar SP-in Kolasib SP hnenah lehkha a thawn tawh a, police kuta thi a nih avangin National Human Rights Commission dan anga a thih dan chhui turin a ngen," a ti a; Dholai Police Station-ah case ziah luh a nih thu a sawi bawk.