NH 102B-in Saitual a hêl dawn vangin Saitual MZP leh SKP-in kawng an ping

National Highway 102B (Keifang-Tuivai) kawngpui sial turin Saitual khua a paltlang ngei an duhzia lantir nan leh Saitual hêltir tum an duh lohzia lantir nan Saitual MZP leh Saikhawpui Ṭhalai Pawl (SKP) ṭangkawp huaihawtin nimin khan Saitual mipuite'n kawngpui an ping.

Saitual MZP leh SKP tarlan danin, NH-102B chu NH enkawltu National Highways and Infrastructure Development Corporation Limited (NHIDCL)-in NH-6 (Keifang-Champhai) lam km. 15-naah Saitual khua hêltirna tur siam an tum avangin surveyor-te chuan nimin khan a hmunah endik an tum a ni. Chu chu duh loin, Saitual khua paltlangtir ngei an duhzia lantir nan NH 6 Keifang aṭanga Champhai lam km. 15 ah leh Saitual to Saichal kawnga Tuivawl lei bulah kawngpui pala pin leh banner târ hnatlang an huaihawt a ni.

NH-102B Keifang-Tuivai kawngpuiin Saitual a paltlang theih nan hian chief minister Zoramthanga chu MNF Ṭawi East Block hoin VC, MZP leh SKP hruaitute'n an hmu tawh a; Chief Minister chuan, surveyor tirh ṭhat leh a nih tur thu leh Saitual paltlang ngei a duhsak thu a lo hrilh.

Pawl pahnih hruaitute chuan, Saitual khua paltlangtu NH-102B kawngpui awm sa tihdang­lam tumna a awm chu an ngaihthiam loh thu leh Saitual hêl zawnga kawng zawn tum a ni chu hriatthiam har an tih thu an tarlang a, "Saitual khuaah NH-102B hi a kal ngei theih nan theihtawp kan chhuah zel dawn," an ti a; an khua a paltlang ngei theihna atan eng pawh huama theihtawp an chhuah zel tur thu an sawi a ni.