Karimganj leh Mamit DC inbiakna sawifiah
Mizoram sorkar chuan thuchhuah siamin, October 31, 2020-a Mamit DC Dr Lalrozama leh Karimganj DC-te Karimgabj-a inbiakna aṭanga thuchhuakah mipuite'n hriat fiah tâwk lo an neihte an sawifiah.
Sorkar thuchhuah tarlan danin, Karimganj DC-in Mizoram police-te Assam rama awm mek anga a sawi chu ama mimal ngaihdan a ni a, Mamit DC-in a pawmpui tih a sawi lo a, ziah lan a ni lo.
Mamit DC chuan, "Tuna Mizoram police awmte hi mipui venghim tura kan ram chhunga awm an ni a, chuvangin, sipaite lak lêt emaw, hnuhdawh emaw kan tum lo. Helai hmunah hian remna leh muanna a awm theih nan te, kan mipuite humhim tur leh kan ram venghim turin kan ram chhungah kan sipaite kan dah a ni. Hei hi Assam sorkar pawhin an hrethiamin an lawm hle zawk tur a ni," tiin a sawi.
Meeting-ah hian DC pahnihte hian an ram chhung a nih thu an sawi ve ve tih tarlangin Mizoram sorkar chuan, "Meeting minute-ah Mamit DC thusawi zawng zawng thai lan a ni lo. Karimganj DC-in an ram chhunga sipai an dah thu a sawite pawh Mamit DC hian thiam takin a hnial thla zel a; kan ram chhungah hian kan sipaite hi Covid-19 avangin duty-in an awm ṭhin a, Karimganj lamin kan ram chhungah thlámte hâlin, huan thlaite an tichhia a, buaina hrang hrang an siam zui avangin sipai pawh dah belh a nih thu a tarlang," a ti.
Sorkar thuchhuah tarlan danin, Karimganj DC hian Medili lei chu Assam sorkar siam a nih avangin an ta niin a sawi a; Mamit DC erawh chuan Assam sorkar siam ni mah se, Mizoram chhung a nih thu leh Mizoram chhungah Assam-in lei a rawn siamsak avangin lawmawm a tih thuin a chháng.
Karimganj DC hian tuna Medili lei bula Mizoram sorkarin IR sipai a dah mekna Forest quarters chu Assam sorkar sak niin a sawi a; chu chu Kawrthah DFO Lalbiakchama Chawngthu-in chhángin, an hriat sual a nih thu a sawi a, "Kum 1985-a Mizoram sorkarin a sak a ni. Medili lui kama Forest plantation zawng zawng pawh hi kum 1983 leh 1984-a Mizoram Forest department-in kan siam vek a ni. Assam Forest official ho pawhin an hria," a ti. Hei hi Karimganj DC leh Assam Forest official-te'n chhàn ngaihna an hre lo a ni.