Hmun hrang hrangah ram a kâng : Lungleia ram kâng helicopter hmangin ṭhelh
Tun hnaiah Mizoram hmun hrang hrangah ram a kâng a, Bungtlang South khuaah chenna in 14 a kâng ral tih loh chu khaw chhunga harsatna thleng hriat a ni lo. Lungleia ram kâng chu nimin khan helicopter hmanga ṭhelh a ni a, he thu ziah lai thleng hian ṭhelh mih a la ni lo.
Lunglei
April 24, Inrinni aṭanga Lungleia ram kâng chu nimin khan Indian Air Force (IAF) chuan helicopter hmangin ṭhelh tumin an bei a, he thu ziah lai thlengin ṭhelh mih a la ni lo. Helicopter hian bambi bucket, tui litre 3,500 dawng khaiin, Tuipui-D aṭangin tui a la a, kâng ṭhelh hna a thawk. Chief minister Zoramthanga'n Lungleia ram kâng ṭhelhpui turin IAF a ngen a ni.
Thu dawn danin, IAF chuan helicopter hmangin nimin khan ṭum hnih kâng ṭhelh hna an thawk a, khua a tlai tawh avangin kang ṭhelh hna a chawlhsan rih. Nizan khan IAF mi leh sate chu helicopter nen Lungleiah an riak.
District hrang hrang aṭangin helicopter hmanga ram kâng ṭhelh tura ngenna a lut a; IAF hotute chuan khawi lam nge vawiinah an ṭhelh dawn tih an hriat loh thu sawiin, "State sorkar thuneitute thu thu a ni ang," an ti.
April 24 zing dar 7:30 vel aṭanga Saisih ram aṭanga kângmei a chhuah hnuah Lunglei khawpuia hmun hrang hrangah ram a kâng a, in kâng kai thuak thuak ṭhin mah se, Fire & Emergency Services leh mipuiin theihtawp chhuaha an vên avangin harsatna lian tham a thleng lo.
Kângmei chu ṭhelh mih thawkhata ngaih a nih hnuah pawh thli a thâwt deuhin a kâng nasa leh ṭhin a; nimin tlai thleng khan ram kâng a la awm reng a, khaw chhung tana hlauhawm rih loah an ngai thung.
Kângmei chhuah vang hian Pathianni tlai khan Environment, Forest & Climate Changte minister TJ Lalnuntluanga, Lunglei North bialtu MLA Dr Vanlalṭanpuia leh MLA Lalrinsanga Ralte-te chuan Lunglei an pan a, nimin khan khaw chhung hmun hrang hrang an tlawh.
Champhai district
Champhai district-a Tuipuiral huam chhung hrang hrangah Pathianni khan ram a kâng a, Pathianni vêk khan khaw hrang hrangte'n a zualpui ṭhelh mit mah se, vèn zui ngai a la awm nual.
April 24-a Khawbung ram Puanvawrh khâm, Samthang ram lam aṭanga chhuk zawnga kâng chu Khawbung Fire Prevention Committee ruahmanna siam angin, nimin varṭian aṭangin Khawbung VC kaihhruainain mipa ramṭang chinin an ṭhelh a ni.
Thing mût leh lumin kângmei a tihchhuah tur véngin uluk takin meilam sial a ni a, meiling lum tur dâlnate an siam bawk. Hetih lai hian, khua a ro avangin mei a chhuak thar leh ṭhin tih an sawi. Samthang ram chhung kâng pawh ṭhelh mih ni tawh mah se, VC hoin nimin khan enfiah a ni a, kângmei chhuak leh thei a awm leh awm loh niléngin an thlithlai a ni.
Serchhip district
Serchhip dái vel hmun hrang hrangah pawh tun hnaiah ram a kâng a, Pathianni zan khan ṭhelh mih kim a ni. Ram kanna hmunte chu - Serchhip Dawngzawl te, Serchhip Vengchung lam hnaih Kawlri tlang mawng, Chanmari Veng huam chhung leh Chhiahtlang dáite a ni.
Nimin khan Thenzawl leh Serchhip inkara Zehtet leh Thuhruk inkar chu nasa takin a kâng leh a, mi tlawmngai leh kangṭhelhtu pawlten a ṭhelh hna an thawk nghal a, he thu ziah lai thleng hian ṭhelh mih a la ni lo. Kângmei hi Mat lui hnaih leilet bial ko sâm faina hâl aṭanga inṭan nia hriat a ni a, kawngpui a kân hman avangin duh anga ṭhelh theih a ni loa thu dawn a ni.
Lawngtlai district
Lawngtlai district-ah pawh August 25, Pathianni aṭang khan kângmei a chhuak ṭan a, Bungtlang South-ah in 14 a kâng. Kângmei chhuak chungchangah hian Lawngtlai DC Dr Andrew H Vanlaldika chuan nimin khan thuthar thehdarhtute a kâwm a ni.
Dr Andrew H Vanlaldika chuan, khaw hrang hranga mipui inpekna avangin vanduaina lian zawk a thlen rih loh thu sawiin, "Central YLA leh YLA branch te, VC leh pawl hrang hrangte inpekna a hlu hle. Kângmei chhuak hi ṭhelh mek a ni a, boruak duhawm lo thleng a awm a nih loh chuan mipui tan a hlauhthawnawm rih lo," a ti.
Lawngtlai DC chuan, râm kangin Phawngpui National Park a thleng rih lo tih a sawi a; Tourism minister Robert Romawia Royte, Lawngtlai West bialtu leh Lawngtlai East bialtu MLA-te'n theihtawp an chhuah thu a sawi bawk.
Kângmei avangin Lawngtlai khawpui leh district chhung hmun eng emaw zat chu nimin khan meikhûin a bawh nasa a, doctor-te chuan páwna chhuak tam lo turin mipui an ngen a ni.