PM Modi-a'n Mizoram a tawrhpui

Prime minister Narendra Modi chuan nimin khan Mizoram hmun ṭhenkhata kâng­mei chhuak chungchang­ah chief minister Zoram­thanga chu telephone hmangin a bia a; Mizoram mipui a tawrhpui thu leh sorkar laipui aṭanga puih theihna kawng hrang hrangah inthlahrung loa hrilh turin CM a chah.

Sorkar thuchhuah tarlan danin, PM Narendra Modi chuan, Mizorama nasa taka kângmei a chhuah chhan a zawt a; CM Zoramthanga chuan, "A chhan lian ber pakhata lang chu khaw khéng vang a ni. Kum danga ruahtui kan dawn ṭhin angah kan la dawng lo a, ṭhál khawro a siam a, kângmei a chhuah awlsam phah niin a lang," a ti.

Zoramthanga chuan, Indian Air Force-in Mizoram an puihnaah lawmthu a sawi a, "Mizoram kângmei chhuakin ziaawm lam a pan a, Mizo mipui leh sorkarin theihtawp kan chhuah tlân avangin kan dinhmun a ziaawm hret," a ti bawk.