RBI-in Mizoram sorkar security lilám

Mizoram sorkar chuan vawiin khan Open Market Borrowing (OMB) hmanga sum pûk turin Reserve Bank of India (RBI) kaltlangin state security cheng vbc. 100 a lilám dawn. Mizoram rual hian state dang 17 security pawh lilam a ni dawn.

Finance department hotute hnen aṭanga Vanglaini thu dawn danin, security lilâm hmanga sum pûk hi sorkarin rulh leh tura sum a pûkna chi khat a ni a, State Development Loan tih a ni. Hun tiam chhung awma pûk tur a nih avangin dated security-te pawh tih a ni ṭhin.

Hetiang hi Open Market Borrowing (OMB) hmanga kalpui a ni a, kum eng emaw zat liam tawh aṭanga sorkarin a kalpui ṭhin a ni a, budget-ah pawh sum pûk tur chu ruahman lâwk ṭhin a ni. Sum dinhmun chhiat leh ṭhat tehna atana hman chi a ni lo.

RBI-in state sorkar tan sum pûk tur a lo zawng a, financial institution-te'n an chháng ṭhin. Kum khatah a pung vawi hnih rulh tur a ni a, kum 10 hnuah sum pûk chu a pumpuia rulh a ngai a ni.

State security lilám tur hian Finance Commission-in ruahmanna a siam leh bithliah a siam angin sorkar laipuia Ministry of Finance phalna (consent) lâk ṭhin a ni. Thil a kal fel hnuah RBI chuan state sorkarte security chu market-ah a lilám a, a duh duhin an chháng ṭhin.

RBI-in OMB hmanga sum pûk tura security a lilàmnaah hian a chhángtu financial institution-te'n a pung an tihsan lutuk chuan RBI-in state sorkar a ràwn hnuah state sorkarin a pawm lo thei. Sum pûk tam lutuk vanga tâlbuai theih a nih avangin sorkar laipui chuan Finance Commission-in bithliah (ceiling) siam chhungah chauh pûk a nihna tur leh state-te laibatna sal (debt trap)-a an tàn loh nan an vênpui ṭhin a ni.