Governor-in Synod puipate a kâwm

Governor PS Sreedharan Pillai chuan nimin khan Raj Bhavan-ah Mizoram Presbyterian kohhran puipate a kâwm a, Covid-19 léng dona chungchang a sawipui.

Governor chuan, state dangte ngaihtuahin Mizoram chu Covid-19 donaa thawk ṭha pawl a nih thu sawiin, "Hei hi a chhan pawimawh tak pakhat chu kohhran hruaitute leh tlawmngai pawl hruaitute puitlinna leh an mawhphurhna an hriat chian vang a ni," a ti.

Covid-19 donaah kohhran hruaitute'n mawhphurhna pawimawh tak an neih thu sawiin Larsap chuan, "Mizoramah chuan Kristian sakhaw betute an tam ber a, hei vang hian Covid-19 donaa mipui zawm tur pawimawh leh sorkar hmalaknate thláwp tura zirtirna kawngah kohhranin mawhphurhna pawimawh tak in nei a ni," a ti a; MKHC hruaitute pawh la kawm a tum thu a sawi.

Mizorama kohhran lian ber Presbyterian Kohhran mawhphurhna a la pawimawh dawn chauh tih sawiin Larsap chuan, "Hri léng donaah kohhran dangte entawn theih ni zel tur leh sorkar thlâwp a ṭul hunah pawh lo inhawng chhunzawm zel turin ka ngen che u a ni," a ti.

Synod puipate chuan, hri léng donaah sorkar laipuiin state a chhawmdâwl ṭhin leh mi harsate tan buhfai a thlâwn leh man tlâwm zawka khul tura ruahmanna a siam ṭhin chu lawmawm an tih thu an sawi a, "Presbyterian kohhran leh kohhran dangte pawhin Covid-19 donaah sorkar an thláwp tlat a ni," tiin, kohhran mipui hnenah fimkhurna chungchang leh zawm tur pawimawhte zirtir ṭhin a nih thu an sawi.

Synod office aṭanga tualchhung kohhran thlengin Covid-19 donaah ke an pên ṭhin tih sawiin Synod puipate chuan, "Tualchhung kohhran tam tak chuan senso ngai leh a ṭula hman atan sum an theh chhuak ṭhin a ni," an ti.

Inkawmnaah hian Mizoram Synod aṭangin moderator Rev. Dr C Lalhlira, secretary (junior) Rev. ZD Lalhmachhuana, executive secretary pahnih Rev. B Sangthanga leh Rev. K Lalrinmawia te an tel a ni.