KHAWTHLIR

Thisen pe
Salvation Army Youth Southern Division chuan nimin khan Lunglei Civil Hospital-ah thisen unit 39 an pe a, petute mipa 31 leh hmeichhia pariat an ni. Nimin vek khan St. John's Higher Secondary School NSS unit chuan Kolasib District Hospital-ah thisen unit 5 an pe bawk.

Covid-19 vangin Mizo missionary thi
Madhya Pradesh-a awm mek Thlarau Bo Zawngtute (TBZ) missionary Laldinpuii (57), Lengpui chu Covid-19 avangin nimin zing dar 3:24 khan Burhanpur khuaa All is Well Hospital-ah a thi. Thu dawn danin, Laldinpuii hi kum 35 chhung missionary-a chhuak tawh a ni a, a ruang chu TBZ Mission compound-ah nimin khan phûm a ni.

Kângmei sawiho
Ngopa SDO (Civil) Vanlalṭanpuia hoin nimin khan an bial chhunga khaw hrang hrang VC, Tuiphai Group YMA, Sialkal Group YMA leh Mawmrang Group YMA aiawhte'n kângmei chhuak ṭhin leh vawk natna léng mek laka him dan tur an sawiho. Ngopa RD Block hnuaia MGNREGS hmalakna tur 'Catch the rain campaign' chungchang an sawiho bawk.

Bawnghnute pe
Rajya Sabha MP K Vanlalvena chuan nimin khan SRH-ZMC a tlawh a, thawktute leh damlote tan bawnghnute Yakult ûm 1,800 a pe. K Vanlalvena MP chuan, SRH-ZMC-ah Covid-19 vei enkawl lai an tam lai ber a nih thu sawiin, "Tunah hian mi 100 chuang hret an awm mek. Mizoram sorkar chuan kum khat lai ZMC hi Covid patient-te enkawl nan a hmang tawh a, patient-te enkawl nan mai bakah, test nante an hmang ṭhin a ni," a ti.

SRH-ah mi 56 awm
State Referral Hospital-ah nimin tlai dar 5 thleng khan Covid-19 vei mi 56 an awm mek. SRH-ZMC Bulletin tarlan danin, mi 56 zinga pasarih chu ICU-ah awmin, pathum chu nimina dah luh an ni a, ICU-a awm mi pasarih zinga panga chu ventilator hmanga enkawl an ni.