ZPM councillor-in Mayor-ah rawtna a thlen

ZPM councillor-te chuan nimin khan Aizawl mayor Lalrinenga Sailo chu a pisaah an hmu a, Covid-19 lêng meka hmalakna tur ṭul nia an ngaihte an thlen.

ZPM councillor-te chuan, Covid-19 second wave léng mek chu boruak aṭanga inkài chhâwn theih nia sawi a awm avangin, AMC Act, 2015 tlawhchhanin extraordinary meeting hnuaia requisitioned meeting ko tur leh, Aizawl khawpui kawtthlêr tin fire service lirthei hmanga phuh thianghlim dan tur sawiho tura inhmuh khawm ko turin an thlen a ni.

March 26, 2021-a AMC Board of Councillors ṭhutkhawmnaa rèl angin, emergency pool fund hman dan tura inkaihhruaina (guidelines) a rang lama siam ṭha an tih thu an thlen a; hripui léng thawh hnihnaah emergency pool fund hmangin veng pathuma LTF hnenah ṭanpuina pek chhuah a nih tawh thu an tarlang.

ZPM councillor-te thu thlen chung changah mayor Lalrinenga Sailo chuan, a rang lama an ngaihtuah tur thu leh a bawhzui tur thu a sawi a ni.