Oxygen-ah thlaphânna tur awm lo

Mizorama oxygen siam chhuahna FK Oxygen Plant neitute zinga mi F Lalmalsawma chuan, tun dinhmunah chuan Mizoram tan oxygen-ah thlaphânna tur a awm loh thu a sawi.

Thuthar thehdarhtute zawhna chhangin F Lal­malsawma chuan, Mizo­ramah oxygen siam chhuahna industry pali a awm thu a sawi a, "Tunah hian LZ Industry nen oxygen kan siam chhuak mek. Kan siam chhuah theih zat ngaihtuahin, tun dinhmunah chuan oxygen-ah thlaphànna tur a awm rih lo. Hma lam hun erawh hriat a ni lo," a ti.

F Lalmalsawma chuan, anmahni (FK Oxygen Plant) ringawt pawhin ni khatah tuna Aizawla oxygen mamawh aia tam an siam chhuah theih thu sawiin, "Chutih rualin, district dang aṭangin demand a sang ve zel a nih erawh chuan buaina chin a awm ve thei," a ti a; tun dinhmunah chuan LZ Industry nen mamawh ang chu an châwm hneh rih thu a sawi.

Oxygen siam chhuak turin power supply a ṭhat a ngaih thu sawiin F Lalmalsawma a chuan, "Current su zeuh a awm pawhin harsatna kan tâwk nghal mai. Khawl function tir leh tur chuan darkar chanve chuangte nghah a ngai. Darkar chanve lek pawh current awm lo se, kan buai phah khawp ang," a ti.

F Lalmalsawma chuan, state dangah oxygen indaih lohna nasa mahse Mizoramah thlaphânna tur a awm lo tih sawiin, "Oxygen siam chhuak tur hian state páwn aṭangin raw material lâk luh a ngai lo. A khawl neih tawh chuan kan raw material ber chu tui leh kan boruak a ni mai," a ti a; a harsatna ber zawk chu a man a to tham avangin oxygen bûr a nih thu a sawi.