Covid-19 leh a kaihhnawihte thlirho
Health & Family Welfare minister Dr R Lalthangliana kaihhruaiin nimin khan Health & Medical Education directorate conference hall-ah sorkar hotute an ṭhu a, Covid-19 inkhuahkhirhna kalpui mek an thlirho.
Ṭhutkhawmnaa IDSP hotute tarlan danin, Mizoramah March 29 leh April 25 inkarah Covid-19 vei mi 948 hmuh chhuah a ni a, mi 948 zinga 580 chu tualchhunga hmuh chhuah an ni.
State pâwn aṭanga rawn lut zingah Lengpui Airport-ah mi 273 hmuh chhuah an ni. Airport-a hmuh mi 273 zinga 193 chu Lengpui Airport an thlen hlima RAT hmanga hmuh chhuah an ni a, mi dang 80 chu Airport screening-a RAT negative, a hnua positive tih hmuh chhuah leh an ni.
Vairengte kaltlanga state páwn aṭanga rawn lut zingah hripui vei mi 84 hmuh chhuah a ni a; an zinga 42 chu screening point-a positive tih hmuh nghal an nih laiin, mi 42 chu screening point-a negative, a hnua hmuh chhuah leh an ni thung.
Kanhmun screening point-ah Covid positive paruk hmuh chhuah an ni a, Zokhawthar kaltlanga rawn lut screening point-a negative, a hnua positive tih hmuh chhuah mi panga an awm bawk. Police contact tracing team hotute sawi danin, April thla chhunga Covid vei mi 934 hmuhte zinga 509 (54.5%) chu tualchhunga kái an ni a, 425 (45.5%) chu state páwn aṭanga rawn lut an ni. Tualchhunga kái zingah hri an kàina chhui chhuah harsa mi 190 an awm.
Aizawl khawpuia local council 84 zinga 70-in Covid-19 positive an nei mek a, tun hnaiah chhungkaw khata cheng ho zingah hri inkái chhâwng an pung nasa a, chhungkaw khata awm zawng zawng hripui vei vekte an
awm tawh.
April thlaa Covid-19 vei tam zualnate chu - Bethlehem/Bethlehem Vengthlang (71), Borkolok, Lawngtlai district (33), Damveng (31) leh Kanan Veng (30)-te a ni. Meeting-a tarlan danin, April 24, Inrinni thlengin Mizoramin Covid-19 vaccine dose 2,99,870 a dawng tawh a, dose 2,07,730 pek tawh niin, mi 41,313-in vaccine an la kim tawh.
Sorkar laipui chhinchhiah danin, Mizorama kum 45 chin chung lam zinga 43.72% hnenah vaccine pek a ni tawh a, tun kar chhungin dose 1,00,000 dawn leh beisei niin, chu chu kum 45 chung lamte hnena pek tur a ni.
Covid-19 vaccine kum 18-44 inkarte pek tur chu sorkar laipuiin state sorkarah a thlâwn vekin a pe vek tawh dawn lo a, state sorkarin vaccine siamtute aṭangin an mamawh ang zat an lei a ngai tawh dawn.
Mizoramah kum 18-44 inkar mi 5,86,702 vel an awm anga chhût a ni a, chu'ng mite tan chuan vaccine manah cheng vbc. 47 vel sên a ngaih rin a ni. Mizoramin vaccine a dawn ṭhin Covishield man tur chu official-in an la dawng lo a, private hospital-te'n an pêk chhuahna man atana Rs. 250 ruahman tawh pawh sorkar laipui chuan a hnûk kîr leh a ni.
Meeting-ah hian Medical Operational Team chairman Dr ZR Thiamsanga, MLA, Chief Secretary, Covid-19 donaa hma latu department hrang hrang hotu te, Indian Medical Association, Non-Government Hospital Association of Mizoram, Joint NGO Coordination Committee leh Mizoram Kohhran Hruaitute Committee aiawhte an tel.
