Governor leh CYMA hruaitute an inkâwm

Governor PS Sreedharan Pillai chuan nimin khan Central YMA hruaitute Raj Bhavan-ah a kâwm a; Covid-19 donaa YMA leh tlawmngai pawl dangte hmalakna chungchang an sawiho.

Governor chuan, Covid-19 donaah YMA-in theihtawpin sorkar a thláwp tih a hriat thu sawiin, "Hri léng donaah hian sorkar hmanruate a tâwk lo a, pawl lian leh chak YMA leh tlawmngai pawl dangte puihna leh puih chhunzawmna sorkarin a mamawh tak zet a ni," a ti a, theihtawp chhuah zel turin a ngen.

Hriat tur pawimawh leh thuràwnte YMA hruaitute aṭanga dawn a beisei thu sawiin Larsap chuan, "Mipui zirtir nasat a la ṭul em em chhan chu, India rama cheng mipui zinga 50% chauhin hmai tuamna an vuah a, vuah zinga a tam zawk chu vuah dik lo an ni," a ti a; hripui laka himna tur thilte zirtir kawngah YMA-in theihtawp a chhuah chhunzawm a ngaih thu a sawi.

CYMA hotute chuan, Covid-19 chhuah tirh aṭangin YMA-in theihtawp an chhuah thu sawiin, "Hri donaah YMA-in sorkar a thláwp. Task force, contact tracing, vaccine leh a ṭulna apiangah theihtawpin ṭan kan la mek a ni," an ti. Covid-19 avanga harsatna bakah, tunlaia ram kâng, tui hna kang leh tui in turah Mizoramin harsatna a tawh mek thu an sawi bawk.

Mizoramah court thutlukna leh mimal ṭhenkhat hmalakna avangin Riverine Reserved Forest (lui kama ramngaw humhalh) a awm loh thu sawiin CYMA hruaitute chuan, "A pawi tak zet a ni. Hei hian Mizoram dung leh vânga lui tuite a ti kang mek niin a hriat," an ti a; a ṭul anga hma lakpui turin Governor an ngen.

Inkawmnaah hian CYMA president Vanlalruata, vice president Lalhmachhuana, general secretary Prof. Lalnuntluanga, assistant secretary Dr Malsawmliana, treasurer Fabian Lalfakawma leh finance secretary Roneihthanga te an tel a ni.