Chamring khuaa lei khì enfiah a ni

Disaster Management & Rehabilitation (DMR) minister Lalchamliana hmalaknain nimin khan tun hnaia Chamring khuaa lei khi chat (crack) chu mithiamte'n an enfiah. Lei khi avanga in sak mek chhunga mi pahnih awmte chu zana riak lo tura hrilh an ni.

Senior geologist P Sanghnuna chuan, lei khi chat thlen chhan chu pialtlêp lung bulṭhut pheh (toe cutting of deep slope) vang a nih thu a sawi a, "Tuna a khîk chahna aṭanga chhak lam metre 40 vela hláah a chêt tawhna hnuhmá anga lang, ruam (depression) a lo awm tawh a ni," a ti.

Lei khi kak awm dan chu tui zai (joint) milin right angle a nih thu sawiin P Sanghnuna chuan, "A hnuai lam panga dâwmtu pheh a nih tâkah chuan lei a tawlh thla ta a, lung mûr hraw leh sín, tlak lung a awm," a ti a; ft. 2 velah lei (soil) a awm bawk thu a sawi.

P Sanghnuna chuan, lei kak zau lai ber chu ft. 11-a zau a nih thu leh, in sírah ft. 6 vel a tawlh thu a sawi a; lei che chin a zauh/tam avangin retaining wall siam aiin, a che chin lei chu paih fai a ṭhat zawk a rin thu a sawi bawk. Mithiamte hian mitigation measures ziakin report an siam dawn.

Lei khi zau zawng (circular sling) chu metre 84 a ni a, ram neitu chu Zoramthanga, Chamring niin, lei khi avanga in sak mek chhunga mi pahnih awmte chu zana riak lo tura hrilh an ni.

Chamring khuaa lei khì endiknaah hian DMR, Geology & Mining, PWD leh IPR department aiawhte leh Aibawk BDO-te an kal a ni.