Vaccine a thlàwna pe turin sorkar phût

Mizoram Pradesh Congress Committee (MPCC) leh BJP, Mizoram Pradesh-te chuan, Covid-19 laka invenna damdawi (vaccine) kum 18 chin chung lamte pek turah, a thlawna pe turin Mizoram sorkar an phût.

India ramah May 1, 2021 aṭangin kum 18 chung lamte hnenah Covid-19 vaccine pek tum a ni a, vaccine man chu sorkar laipuiin a tum vek tawh dawn loh avangin state sorkarin eng emaw zat a tum ve a ngai tawh dawna sawi a ni. Hetih lai hian, Health Minister-in April 24, Inrinnia Lengpui a tlawhnaah, Mizoramah kum 18 chung lamte vaccine pek turah a man a awm mai theih thu a sawi.

BJP chuan, kum 18-45 inkarte'n Covid-19 vaccine lâk man an pek a ngaih mai theih thu Health Minister-in a sawi chu ngaihtuah nawn thuai turin sorkar an ngen a, "Covid vaccine kum 18 chung lamte tan man chawia pek tum a ni hi hriatthiam har kan ti a, man chawi loa pek dan ngaihtuah turin Mizoram sorkar kan ngen a ni," an ti.

Congress party chuan, "Hmarchhak state ṭhenkhat - Arunachal Pradesh, Assam, Tripura leh Sikkim-te chuan kum 18 chung lamte vaccine pek tur hi a thlâwna pek an tum thu an puang tawh," an ti a; India ram state dang eng emaw zat pawhin a thlàwnin pêk an tum tih an sawi.

MPCC tarlan danin, Arunachal Pradesh cabinet meeting-in April 23 khan kum 18 chung lamte a thlâwna vaccine pek an remti a, chuta tan chuan vaccine dose 4,00,000 leina tur cheng vbc. 65 an ruahman. Tripura cabinet meeting pawhin a thlâwna pek tur a nih thu an puang tawh a, cheng vbc. 133.19 an dah. Sikkim sorkar chuan kum 18 chung lamte a thlàwna an pek tur thu April 22-ah an puang a; Assam Health Minister pawhin April 20 khan a thlâwnin vaccine an pek zel tur thu a puang bawk.

Congress party chuan, Covid-19 léng chu Mizoramah chhungkaw tam tak eizawnnain a tuar hle tih sawiin, "Ni tin eichawp dapa khawsa tan phei chuan sum tam tak sénga Covid-19 vaccine lak hi thil theih loh tluk a ni dawn. Nikumah sample test man sang tak siam avangin inringhlel tam tak an in test ngam tawh lo a, MNF sorkarin kum 18 chung lam tana vaccine lâk man siam a tum hi thil ṭha lo tak a ni," an ti.

Kum 18-45 inkarte hnenah a thlàwna Covid-19 vaccine pe tura MNF sorkar phûtin MPCC chuan, "Chhungkaw tina SEDP cheng nuai 3 sem tum MNF sorkar hian a thlàwna vaccine pekna tur a nei ngei turah kan ngai," an ti a; CM Covid Fund-ah cheng vbc. 22 chuang thawh khawm a nih aṭang leh chhan hrang hrang vanga mipui sum chawi tling khawm aṭangin tam tak pek theih a nih an rin thu an sawi.

BJP chuan, Mizoram sorkarin man neia Covid vaccine pek a tum chu sorkar pachhiatzia tilangtu leh hriselna lam an ngaih pawimawh lohzia tihlannaa an ngaih thu an sawi a, "Sorkar hnathawk pension tawhte'n pawisa an la thei lo leh sorkar hnathawkte'n GPF-a an dah, anmahni sum ngei pawh an la thei lo hi sorkar hnathawkte zah lohna leh hmuhsitnaah kan ngai. CM Zoramthanga, Finance minister hi sum enkawl chungchangah a hlawhchham let dêrah kan ngai bawk," an ti.