Mizoram kawlphetha man bá pek loh chuan Kawlphetha pêk tihtawpah sorkar vau a ni

Congress party ṭhalaite chuan thuchhuah siamin, Mizoram sorkarin kawlphetha hman man tam tak a bat avangin NHPC leh NEEPCO-te'n ba pe turin an nawr a, sorkarin bá a rulh loh chuan kawlphetha pek chhunzawm lohah Mizoram sorkar an vau tih an tarlang.

MPYCC chuan, "Chhiatna chi hrang hrangin min bawm mek laia Mizoram sorkar sum leh pái enkawlna kawnga a inthlahdah avanga kawlphetha kan chhit mek tihtawpa vauna lehkha kan dawng hi pawi kan ti hle a ni," an ti.

MPYCC tarlan danin, kawlphethaa Mizoram châwmtu NHPC Ltd-in April 19, 2021 khan Mizoram Power & Electricity Engineer-in-Chief hnenah lehkha an thawn a; Ministry of Power danin a phût angin, Mizoram sorkarin kawlphetha a hman man a bat cheng vbc. 1.42 chu ni 45 a liam tawh avangin, April 2021 chhunga a rulh loh chuan kawlphetha an pek chhunzawm theih dawn loh thu a hrilh a ni. NHPC-a Mizoram sorkarin a bat chu a pung nen cheng vbc. 2.49 a tling.

NEEPCO Ltd pawhin April 20, 2021 khan Mizoram P&E Engineer-in-Chief chu leiba ṭhìnna lehkha an thawn bawk a; Ministry of Power dan thar angin, kawlphetha hman man chu Mizoram sorkarin ni 45 a bat tlin tawh avangin, a rulh loh chuan hma an lâk tur thu an ziak a ni.

NEEPCO tarlan danin, kawlphetha hman man Mizoram sorkarin a bat chu cheng vbc. 42.49 a ni a, chu'ng zinga cheng vbc. 9.71 chu ni 45 chuang Mizoramin a ba tawh. Cheng vbc. 11.28 chu April 25, 2021-a ni 45 tling leh tur a ni bawk.

MPYCC chuan, Mizoram sum dinhmun Congress sorkarin nasa taka a siamṭhat tawh chu kum hnih leh a chanve chhungin MNF sorkarin an sawp chhe leh vek tawh nia sawiin, "A pawi hle a ni. Sorkarin Covid-19 pandemic chhuanlamah a hmang zel a, a bul ber chu sum enkawla an hlawhchham vang a ni," an ti.