Sorkar thâ tichak turin mipui ngen

Mizo National Youth Front (MNYF) chuan, Mizo mipuite'n ṭha taka sorkar an thlawpna chu lawmawm an tih thu sawiin, sorkar thâ tichaktu ni zel turin mi tin an ngen a; ram mipui harsatna sukiang tura sorkar hmalak dan chu Mizoram tan méllung pawimawh tak a nih thu an sawi.

MNYF chuan thuchhuah siamin, tunlaiin Covid-19 hripui leh Mizoram-Assam ramri buai vangin Mizo mipuite harsatnain a rualin a nuai tih an sawi a, "Sorkarin theihtawp chhuahin mipuiin harsatna lian tham an tawh lohna turin hma a la reng a, mipuite'n ṭha taka sorkar kan thlàwpna hi lawmawm kan ti a, sorkar thâ tichaktu ni zel turin, theihtawp chhuah zel turin mi tin kan ngen a ni," an ti.

Harsatna hrang hrang awm kara Mizoram sorkarin October 30-31, 2020-a Manipur aṭanga mamawh phur tura oil tanker leh truck eng emaw zat tirh chhuah a ni chu Mizoram tan méllung pawimawh tak a nih thu sawiin MNYF chuan, Supply Minister leh thawktu zawng zawng fakawm an tih thu an sawi a; "Manipur lama kan unaute'n Mizoram châkkhai lam tura thang driver-te an lo dawnsawn dan hi ropui kan ti tak zet a ni," tiin, an hriat reng tawh dawn thu an sawi.

MNF ṭhalaite chuan, Tripura aṭanga oil leh gas lak luh a nih theih nana sorkar hmalakna leh, Bairabi leh Zamuang inkar kawng siam nghal a ni chu lawmawm an tih thu an sawi a; Silchar-a Mizo driver tangkhangte Mizoram pantira véngtu Assam police-te'n Lailapur-ah an relh bosan chu an dem thu an sawi bawk.