Paid covid care centre siam

Aizawl DC Dr Lalhriatzuali Ralte chuan nimin khan man cháwia Covid-19 positive-te awmna tur, paid covid care centre (PCCC) inkaihhruaina a tichhuak a; PCCC-ah hian natna (symptom) lang lote chauh awm phal a nih thu leh naupang awm phal a nih loh thu a tarlang.

Aizawl Bawrhsapin hriattirna a chhuaha a tarlan danin, PCCC-a awm tur tan mahni bialtu chief medical officer (CMO) emaw, entry point-a duty medical officer (MO)-te aṭangin symptoms nei lo an ni tih hriatpuina lak a ngai a, doctor hriatpuina nen chuan Aizawl DC-ah phalna lak tur a ni. Awm man, ei leh in man leh inenkawlna man (medical fee)-te chawi vek a ngai a, blood pressure endikna hmanrua, infrared thermometer leh pulse oximeter-te intum a ngai bawk.

PCCC-a awm theih dan
1. Bialtu CMO emaw, entry point-a duty MO-te hnen aṭangin symptom nei lo an ni tih hriatpuina neih a ngai.
2. CMO/MO hriatpuina thil telin Aizawl DC-ah dilna thehluh tur.
3. DC-in phalna a pekte chauh PCCC-ah an awm thei.
4. PCCC-a awmte'n an awm chhunga awm man, ei leh in man, inenkawlna man (medical fee) an pek a ngai; a mante chu CMO-in an ruahhman ang.
5. Awm man chu guest house/ lodge-te'n an bituk ang a ni a, ei leh in man erawh chu ei dan mila pek tur a ni.
6. Naupang ni lo, Covid-19 positive leh symptom nei lo, natna dang enkawl ngai neite chu PCCC-ah awm phal a ni lo.
7. PCCC-a awm turte'n BP apparatus, thermometer leh pulse oximeter-te an intum ang.
8. Awm man, ei leh in man leh medical fee-te chu online payment hmanga pek tur a ni a, pawn lam aṭanga peksak tur a nih chuan sumfaia pek theih a ni.