CM leh HM hnuh kal chawp ngai kan nei hi a vanduaithlak - ZPM Ṭhalai

ZPM Ṭhalai chuan thuchhuah siamin, Mizoram Chief Minister leh Home Minister chu hnuh kal chawp ngai nia an ngaih thu an tarlang a; Mizoram sorkarin dik tak leh huaisen taka ro an rèl theih nan ṭawngṭaipui turin mipui an ngen.

Mizoramin hnuh kal chawp ngai CM leh HM a nei chu vanduaithlâk an tih thu sawiin ZPM Ṭhalai chuan, "Kan kiang lawka Mizo driver-te ni eng emaw zat mangang taka tángte chhan chhuak thei lo sorkar kan nei hi a vanduaithlâk a, a nunràwnthlak bâkah, ram leh hnam huap pawha thil zahthlâk leh mualphothlâkah kan ngai," an ti.

ZPM ṭhalaite chuan, "Kan ram hian pa ena en theih, thil lawmawm lam chauh ni lo, thil lawmawm loh lam a lo thlen pawha mawh la ngam CM kan nei lo hi lungchhiatthlâk kan ti a, Mizoram hi hun thimah a lut mek niin a lang," an ti a; sorkarin dik leh huaisen taka ro an rêl theih nan ṭawngṭaipui turin mipui an ngen a ni.

Mamit DC leh Karimganj DC-te October 31-a Karimganj-a an inbiak chungchangah ZPM Ṭhalai chuan, MNF kaihhruai sorkarin Karimganj DC hnenah Thinghlun chhehvel Assam huam chhung a ni tih nemnghet turin Mamit DC a tír nia an ngaih thu an sawi a, "Zoram mipui rilru a tiná a, ṭan rual hun a nih thu MNF-in an sawi chàmchí laia a rûk a rála Mizoram sorkarin Mamit DC a tír hi mipui bumna lian tak a ni," an ti.