Sumah sorkar a tâlbuai mek - MPCC

Mizoram Pradesh Congress Committee (MPCC) chuan thuchhuah siamin, sum leh pai enkawl kawnga MNF sorkar hlawhchhamzia a lang chiang zel a, sumah sorkar a tâlbuai mek niin an tarlang.

MPCC chuan, MNF sorkarah sum leh pai harsatna a thleng mek a, sorkar hnathawk group A leh B-te hlawh an pe thei lo tih sawiin, "Bill tam tak Treasury-ah a táng mek a, sorkar hnathawk pension pawisa pawh la thei lo tam tak an awm. Hengte hian sum leh pai enkawlna kawnga MNF sorkar hlawhchhamzia a tarlang chiang hle," an ti.

Covid-19 léng vanga India ram economy tlakhniam dan te, ramin a buai phah dante thlirin, Mizoram chu sum leh pai harsatna nasa tak tâwk thei reng a ni tih an hmu lâwk tih sawiin MPCC chuan, "Chuvang chuan Covid-19 lèn laia sorkar sum chêt vel dan pawh nasa takin kan sawisel tawh ṭhin," an ti a; ei leh bàr khawih thil ni lo, sport, entertainment leh party worker-te tana thawh tur hmanhmawhthlak loh contract pekte chawlhsan a hun thu an sawi ṭawh tih an sawi.

MNF sorkarin eptu party-te leh mithiamte thuràwn an ngaithla duh lo tih sawiin MPCC chuan, "Congress sorkar liam tain a budget siam sa aṭanga vaibelchhe tam tak a hnutchhiahte chu ruahmanna fel nei loin an hmang ral a, an budget siam an hman aṭang chiahin an buai ta a ni," an ti.

MPCC tarlan danin, mipui thawhkhawm CM Relief Fund hmangin sorkar bungrua tur cheng vaibelchhe tam tak man lei a nih laiin, MNF party worker, an duhsak zawngte hnenah contract cheng nuai tam tak man an pe reng thung. Sorkar hnathawk hlawh an batsak a, group A leh B-te hlawh an pek theih loh laiin work order thar an tichhuak reng a, MNF worker-te'n hna thawh tur an nei reng tho a ni.

Congress party chuan, Mizoram pumpui dinhmun aia party worker-te pum puarna tur an ngaihtuah zawk tlat avangin MNF sorkar an tâlbuai ta tih an sawi a; CSS hnuaia thawkte hlawh chungchangah harsatna awm ṭhin mah se, sorkar hnathawk nghet hlawh pe thei lo khawpin Mizoram sorkar a awm ngai lo tih sawiin, "MNF sorkar kan hrawn mek hi Mizoramin sorkar a neih tawh zinga sorkar chhe ber a ni tih a chiang hle," an ti.