Kuminah kângmei chhuakah mi 3 an thi : Jan-March ah nuai 17,76.56 hû a kâng ral

Mizoram Fire & Emergency Services (MFES) chhinchhiah danin, kuminah March 31, 2021 thlengin in, ram leh thil kâng dangah Rs. 17,76,56,800 hû a kâng ral a, kâng ṭhelhna avangin Rs. 5,19,04,500 hû hum a ni a; kângmei vangin mi pathum an thi.

January-March, 2021 chhungin Mizo­ramah in 30 a kan tawh bakah, ram kâng 133 leh electric ban leh thil dang kâng 31 a awm a; March thlaah kângmei chhuak a tam ber. MFES hian kuminah thla thum chhungin kângmei chhuak vanga kohna ṭum 189 an dawng a, chu'ng bakah chuan chêt chhuah ngaihna dang 31 an nei a ni.

February 25, 2021 khan East Phaileng leh Kepran inkara ram kâng ṭhelhnaah Zamawia (87) a thi a, March 10 khan Ngaizawl khaw ram kâng ṭhelhnaah Khup Sian Sanga a thi. March 7 khan Bawihkima (74), Ruallung chu an in kângah a kâng hlum bawk.

Kum 2019 khan Mizoramah in kâng ṭum 46 leh ram kâng ṭum 82 a awm a, kângmeiin a tihchhiat zawng zawng chu Rs. 3,43,88,930 hû a ni a, kang ṭhelhna aṭanga an chhanhim hlut zawng chu Rs. 9,83,55,000 a ni thung.

Kum 2020-ah in kâng 37 leh ram kâng ṭum 131 a awm a, kângmeiin a tihchhiat zawng zawng chu Rs. 5,22,79,768 a ni a, kâng ṭhelhna aṭanga chhanhim hlut zawng chu Rs. 11,75,22,432 a ni thung. Kuminah January-March thla chhunga in, ram leh thil kâng danga kâng chhia hlut zawng chu Rs. 17,76,56,800 a ni a, kâng ṭhelhna aṭanga chhanhim hlut zawng chu Rs. 5,19,04,500 a ni.

MFES director C Lalthanmawia chuan, "Kângmei a chhuah hian a chhan leh vang nia sawi hi electric kal sual vang tih ringawt hi a pawi. Inthlahdah vanga kângmei chhuak hi IPC-ah hrem theihna a awm a ni," a ti.

Kangṭhelh motor chu danin a hum tih sawiin C Lalthanmawia chuan, "Kangmei a chhuah a, hmanhmawh taka fire motor kalin tih luih ni loa hmanhmawh vanga mi thil a tihchhiatin, Mizoram Fire Service Act leh Rules hian law court-a min khin theih loh nan venhimna provision min pe a ni," a ti a; kângmei a chhuah chánga mipui pungkhawm tam lutuk chu inzirtirna avangin a zia hret thu a sawi.