Champhaiah Covid-19 dona-a hmalak dan tur rel

Champhai District Level Task Force on Covid-19 chu nimin khan an chairman, DC Maria CT Zuali hoin DC conference hall-ah an ṭhukhawm a, Covid-19 dona-a hmalakna hrang hrang leh hmachhawpte an rel.

Maria CT Zuali chuan Covid-19 hripui leng mek karah tun dinhmunah an district chu fihlim rih mah se, nakin zel tur ngaihtuah a ngaih thu sawiin, "Vantlanga inkaidarh thlenga awm thei anih avangin hmalak dan tur ruahmanna felfai tak siam lawk a ngai. Rilru fim tak nena hmalak dan tur leh hmachhawpte a theih chen chena ruahman lawk a ṭul. Ei leh bar zawn kawnga bahlah chuang loa sorkar duan inkaihhruainate ngaipawimawh chung zela khawsak thiam a ngai," a ti.

Champhai SP Rex Zarzoliana Vanchhawng chuan Covid-19 No Tolerance Fortnight hman mekah sorkarin inkaihhruaina a siam zawm lote enfiah anih thu leh himna kawnga inzirtirnate kalpui pah reng a nih thu sawiin, District Level Task Force member-te chu an hnathawh leh duty dante thlirpuia ngaihven turin a sawm.

Thusawitu dang Champhai CMO Dr R Lianmawia chuan Covid-19 darh zel tur ven kawnga pawimawh tak Contact Tracing Team leh Sample Collecting Team-te mumal taka kalpui anih thu sawiin, "Contact tracing bikah rinhlelh kai zualte ngaihpawimawh hmasak ṭhin a ni. Covid-19 veite enkawlna hmun Covid Care Centre-ah khum 34 leh Dedicated Covid Health Centre (DCHC) ah khum 42 awm thei tura ruahmanna siam a ni," a ti.

Meeting-ah CCC a khum awmte tun dinhmunah mamawh phuhru rih mah se, nakin zela hman theih turin khum dangte pawh thuamṭhat te, ramri dep khuate hnenah fimkhur zel tura hrilhhriat nawn fo te, Covid-19 vanga khua leh khua inthinhrikna awm theite enzuia thleng lo tura mipuite zirtir nasatte leh  zin veivakte phurtu lirtheiahte passenger list felfai tak a awm leh awm loh ngun taka vil zuite an rel.