Land Revenue & Settlement dept-in RTI zawhna an chháng kim thei lo

Land Revenue & Settlement (LRS) department chuan Land Revenue & Survey Board-in hma a lâkna chungchangah RTI Act hmanga zawhna an chháng thei lo a; sum hmanna chungchang erawh an chháng thei thung.

RTI Act hmanga zawhna hi LRS department chuan LRS Board hmalakna chung-changa zawhna thla nga hnuah an pe chhuak chauh a; LRS department SPIO-in zawhna a chhan dan chuan, LRS Board-in sum a hman ral tawh chu Rs. 81,24,070 a ni.

LRS Board-in kum 2019-20 chhunga sorkar aṭanga sum an hmuh Rs. 19,28,650 chu an hmang zo tawh a; kum 2020-21 chhunga an sum hmuh Rs. 66,00,000 aṭangin Rs. 64,71,360 hmang tawhin, Rs. 1,28,640 an la nei.

Kum 2020-21 chhungin LRS Board chuan sorkar aṭangin ṭum hnih sum an dawng a; an dawn hmasak zawk Rs. 25,14,000 aṭangin Rs. 97,980 an hmang bâng a, an dawn hnuhnun zawk Rs. 40,86,000 aṭangin Rs. 3,06,600 an hmang bâng bawk.

RTI Act hmanga zawhna hi October 13, 2020-ah SPIO-ah thehluh a ni a, chhanna chu thla khat (ni 30) chhunga pek tur a nih laiin, thla nga hnu, April 19, 2021 khan an pe chhuak chauh a ni.

Kum 2019-20 leh 2020-21 chhung hian Rs. 81,24,070 hmang tawh mah se, LRS department chuan LRS Board din a nih aṭanga an ṭhutkhawm tawh zat te, Board hmalakna chungchang te, hmalak zelna tura ruahman lâwk chungchanga zawhnate an chhang thei lo vek a ni.