Lunglei leh Siaha district-a kangmei A chhuah chhan chhui tur din a ni

Lunglei Police-te chuan Lungleia kângmei chhuah ṭan ni, April 24, 2021 tlai aṭangin ram a kan chhan an chhui ṭan a, rinhlelh man an la nei lo. Hetih lai hian, nimin khan kângmei chhuah chhan chhuitu tur Special Investigation Team (SIT) din a ni.

Siaha District Fire Prevention Committee nimina Siaha DC conference hall-a ṭhukhawm pawhin tun hnai, April 25 leh 26-a Siaha district-a ram kângte zir chiangtu tur investigation team an din.

Vanglaini palai zawhna chhangin Lunglei SP Rex Zarzoliana chuan, kângmei chhuah chhan chu April 24 tlai aṭangin an chhui nghal tih a sawi a, "A tikângtu nia rinhlelh nia sawite leh a sawitute pawh kan be zel a, mahse, han rinhlelh tur tak an la awm lo. Theihtawp chhuahin kan chhui zel a, vawiin (Thawhlehni) thleng hi chuan rinhlelh man kan la nei lo," a ti.

Hetih lai hian, Lunglei DEF chuan thuchhuah siamin, kângmei chhuah chhan chhui turin SDPO kaihhruai SIT din a nih thu an tarlang a, "SIT hian ngawrh takin kângmei chhuah chhan chhui chian lai mek chu an chhunzawm dawn a ni," an ti a; hnu chhuina kawngah SIT ṭawiawm turin mipui an sáwm.

Lunglei Police chuan, kângmei chhuah chhana mawhphurtu hriate chu phone number 8974362101 leh 9366133662-ah hriattir turin an ngen a ni.

Tarlan tawh angin, Lunglei Saisih ramah April 24 zing dar 7:30 vel aṭangin ram a kang ṭan a, chumi hnuah Lunglei hmun hrang hrangah kangmei a darh chho a ni. Khaw chhung tana hlauhawm thei khawpin kangmei hi a chhuak a, khaw chhunga harsatna liantham a thlen hmain Fire & Emergency Service mi leh sate leh mipuiin an dang thei a ni.

Kangmei hi a nasat avangin a ṭhelh turin Indian Air Force pun an ni a, anni hian an helicopter hmangin Thawhṭanni khan ṭum hnih kangmei ṭhelh hna an thawk. Kangmei hian ziaawm lam a pan tawh a ni.

Siaha District Fire Prevention Committee ṭhutkhawmah hian Mizoram hmun hrang hranga ram kâng leh Siaha district chhung hmun hrang hranga ram kâng chungchang an sawiho a; Fire and Emergency Services (FES) department pawh rîkrum thilah chuan Siaha District Disaster Management Authority thu anga awm tur an nih thu an hriattir nghal a ni.

Covid-19 vanga inkhuah­khirhna thupek chu khauh leh zuala kengkawh turin village task force-te an ngen a, an huam chhung ṭheuhah kângmei laka fimkhur a ṭul thu nasa zawka zirtir turin an ngen.

FES department chuan, Siaha khawpui aṭanga km. 20 aia hláah kangṭhelh motor an kalpui dawn chuan Aizawl lama an hotute dil phawt a ngaih thu an sawi a, "Fire tender pahnih kan kawl mek a, pakhat hi a fit ṭha tâwk lo hle," an ti a, thawktu an indaih loh thu an sawi bawk.

Saiha College NSS chuan thingtlang khaw pathuma ram kan chhan an zirnaah - lo/huan/leipui hâl hun sokarin a bituk an zâwm ṭha lo a, meikawng an sial ṭhat loh bakah, dan bawhchhiate pawh hrem an ni lêm lo tih tarlan a ni.

MADC sorkara Forest department hotute chuan, lo neitu tam takin an mangkhawhte an hâl ṭhat lehnaah an fimkhur tâwk loh ṭhin thu te, Covid-19 vanga inkhuahkhirh hun chu hun tháwla ngaia a rûka luia kal an tam thu leh chu'ng mite chu kângmei chhuak thei lakah an fimkhur tâwk loh ṭhin thu te, sa pêla ramvâk ṭhenkhatin an sa um chhuah nan ram hâl mai an chínga hriat a nih thute an sawi.