KHAWTHLIR
Mi 380 man
Mizoram police leh task force-te chuan April 26, Thawhṭanni zing dar 9 leh nimin zing dar 9 inkar khan Mizoram (Containment and Prevention of COVID-19) Act, 2020 bawhchhia mi 380 an man a, an pawisa chawi tlingkhawm chu Rs. 65,700 a ni. Heti hian May 4, 2020 aṭanga nimin zing dar 9 thleng khan dan bawhchhia mi 86,184 man an ni tawh a, an pawisa chawi tlingkhawm chu Rs. 1,73,33,100 a ni.
Ram kâng pawi ti
Mizoram Environment and Forest Consultative Forum (MEFCOF) chuan, khua a ro avanga Mizoram hmun hrang hranga kângmei a chhuak nasa chu pawi an tih thu an tarlang. Lunglei, Lawngtlai leh Siaha district-a khaw 64 chuangin kângmei an tuar tih sawiin MEFCOF chuan, "Kângmei chhuak hi mi ṭhenkhat inthlahdah vang ni ngeia ngaih theih a ni," an ti a; ram kânga mawhphurtute thuneitute'n zawng chhuak ngei se an duh thu an sawi bawk.
By-election sawn
State Election Commission chuan, May 4, 2021-a Republic Veng Local Council by-election neih tura ruahman tawh chu Covid-19 hripui léng mek avangin tiam chin awm loa sawn a nih thu a puang.
Catch the Rain
Lawngtlai District Rural Development Agency (DRDA) chuan nimin khan BDO BNRGSK hall-ah Jal Shakti Abhiyaan (JSA) hnuaia hmalakna, ruahtui khâwl pawimawhzia inzirtirna, 'Catch the Rain' (Rainwater Harvesting) Campaign 2021 an buatsaih a, district bawrhsap Dr Andrew H Vanlaldika'n a hmanpui a ni.
SRH-ah mi 70 awm
State Referral Hospital-ah nimin khan Covid-19 vei mi 15 dah luh an ni a, anni nen nimin tlai dar 5 khan hripui vei SRH-ah mi 70 enkawl mek an ni. SRH-ZMC Bulletin tarlan danin, mi 70 zinga pasarih chu ventilator nen enkawl mek an ni a, chu'ngte chu ICU-a awm mi pali leh ward-a awm mi pathum an ni.