Sum harsatna vangin inkhung hranna senso sorkarin a tumsak thei tawh lo

SDMA hnuaia State Executive Committee chairman Lalnunmawia Chuaungo, chief secre­tary chuan April 26, Thawhṭanni khan inkhung hran dan tur inkaih­hruaina a tichhuak a; Mizoram sorkarin sum harsatna a tawh avangin inkhung hranna senso sorkarin tumsak vek a ṭul loa a ngaih thu a tarlang.

Chief Secretary-in a tihchhuah inkaihhruaina chuan, sorkarin sum harsatna a tawh mek thu tarlangin, "Sorkarin sum harsatna a tawh mek avang leh inrenchemna a kalpui mek avangin inkhung hranna senso zawng zawng chu sorkarin tumsak vek a ṭulin a hre lo a, chuvangin, thu leh awm hma chu inkhung hranna senso zawng zawng chu khung hrante'n an tum vek tur a ni," a ti.

Lalnunmawia Chuaungo chuan, "State Disaster Management Authority-in hun rei lo te chhung chám tur tiam loin, Mizorama lut zawng zawng quarantine vek tur a tih avangin, sorkar chuan institutional, khawtlang (community) leh hotel/homestay quarantine-te chu thar thawh leh ṭha a ti," a ti a; ruahmanna chuan mahni ina inkhung hranna tur nei lote harsatna a sut kian beisei a nih thu a sawi.

Chief Secretary tarlan danin, ṭul zual bik thil vanga khung hran mekte'n chhuah hma an duh chuan mahni sensoin RT-PCR hmangin swab test tih theih a ni a; Mizoram an luhnaa RAT negative result an neih tawh chu RT-PCR hmanga negative a ni tih finfiah/nemngheh a nih chuan inkhung hran zui a ngai tawh lo.

Khung hran mek zingah Covid-19 natna (symptom) neia inhria leh taksaa lang chhuak nia inhria chuan a hmuna duty emaw, medical helpline no. 102/0389-2323336/0389-2318338-ah hriattir vat tur a ni.