Police zingah Covid-19 vei Mi 100 chuang hmu chhuak
Tun hnaia West Bengal state Assembly inthlanpuia duty Mizo police-te'n Covid-19 an kài leh kài loh hre turin nimin khan an hmunah RAT hmangin swab sample endiksak an ni a, hriat theih chinah nimin tlai thleng khan Covid-19 vei mi 100 chuang hmuh chhuah a ni.
Thu dawn danin, West Bengal Assembly inthlanpuiah hian venhim hna thawk turin Mizoram aṭangin police ṭhahnem tak an kal a, MAP leh IR battalion hrang hranga mite pawh khawm an ni. Inthlana duty zo rawn haw zinga eng emaw zat chu an battalion hmunah an kal tlang nghal a, Police Training School (PTS), Thenzawla inkhung hrang tura dah eng emaw zat an awm bawk.
Police rawn haw hlimte chu nimin khan hmun hrang hrangah an swab sample endik a ni. Nimin tlai dar 5 thleng khan PTS awm zingah mi 263 endik zingah Covid-19 vei mi 64 hmuh chhuah a ni a, a zatve velin symptom an nei. Rengdila awm 4th IR police zinga mi 91 endikah 39 hmuh chhuah a ni bawk a, symptom nei an awm lo. PTS-a awm leh 4th IR hmuna hmuh chhuah zawng zawng chu mi 103 an ni.
West Bengal inthlanpuia Mizoram police duty rawn haw zinga tam tak chu an battalion hmunah an kal nghal avangin, he thu ziah lai thleng hian battalion danga Covid-19 positive hmuh chhuah zat hriat theih a la ni lo.
Nimina swab sample endiknaa Covid-19 vei hmuh chhuahte hi nimin tlai thlenga Mizoram Covid-19 statistics-ah telh a la ni lo a, test result vawiina chhuakah tarlan beisei a ni.