Ram kângin ziawm lam a pan

Tun hnaia Mizoram hmun hrang hranga kângmei chhuak chuan ziaawm lam a pan deuh a, chutih rualin, hmun ṭhen­khatah kângmei chhuak thar a awm bawk. Nimin khan kâng ṭhelh turin Indian Air Force (IAF) helicopter pakhatin Lengpui a rawn thlen belh.

Kângmei chhuahna hmun hrang hrangah Fire & Emergency Services mi leh sa leh mipuite'n kâng ṭhelh hna an thawk. Hmun ṭhenkhatah kângmeiin ziaawm lam a pan a, Lungleiah pawh he thu ziah lai thleng hi chuan kângmei nasa tak hmuh tur a awm tawh lo a, khaw chhung tan a hlauhawm rih lo.

Lungleia awm mek IAF helicopter chu nimin khan Lawngtlai district-a ram kâng ṭhelh tumin ṭum hnih a thawk chhuak a, mei khû a nasat avangin an hlawhchham. Nimin zinga IAF helicopter rawn thlen belh hmangin Serchhip district-a ram kâng ṭum hnih ṭhelh theih a ni thung.

Hetih lai hian, nimin khan Mamit district-a New Kawnpui khaw ram nasa takin a kâng a, khaw bul lawkte pawh a kâng thleng a, mahse, nimin tlai thleng kha chuan in kâng kái a la awm lo. Khaw chhunga chhungkaw eng emaw zat chuan an bungruate páwnah an thiar chhuak a ni.