CM hmalaknain IAF an lo kal - MNF

MNF party chuan thuchhuah siamin, Indian Air Force (IAF)-in helicopter hmanga Lungleia ram kâng ṭhelh hna an thawk chu chief minister Zoramthanga hmalakna vang liau liau a nih thu an tarlang.

Mizoramah a vawi khat nan IAF-in helicopter hmangin April 26, Thawhṭanniah Lungleia ram kâng ṭhelh hna an thawk tih sawiin MNF chuan, "He thil thleng chungchangah hian sawi nâwi phêt tumna leh a titu-ah mi dang tute emaw tih anga thu lo thehdarha thangṭhat lak tumte an awma hriat a ni. Hei hi kan CM chak tak leh thil ti thei tak Pu Zoramthanga hmalakna vang liau liaua tihhlawhtlin a ni," an ti.

MNF chuan, IAF-in Mizorama ram kâng ṭhelh tuma hma an lâkna chu inhnial buai nana hman tura an ngaih loh thu sawiin, "CM Pu Zoramthanga'n thangṭhat a khum tur lo sawi nâwi a, sawi pelh ṭãlh lo tumtute hian sawi zui tawh lo se kan ti," an ti a; CM Zoramthanga chu chhuanawm an tih thu leh innghahna tlâka an ngaih thu an sawi.