Mitigation Project chungchang sawiho

Disaster Management & Reha­bilitation (DMR) minister Lalchamliana hoin nimin khan DMR department hotute'n National Disaster Management Authority-a Mitigation Project an thehluh chungchang leh Mizoram hmun hrang hranga kângmei chhuak chungchang an sawiho.

DMR Minister chuan, tun hnaia Mizoram hmun 30 dáwn laiah ram a kâng chu pawi a tih thu sawiin, "Bungtlang South-ah phei chuan chenna in 14 lai a kâng chhia a ni. Chief minister Pu Zoramthanga hmalaknaa Lunglei chhehvel bakah, district dangtea ram kâng ṭhelh nana helicopter hman theih a ni kha a lawmawm hle," a ti a; khaw hrang hrangin an ram chhung kâng ṭhelh tura an thawh nasatzia sorkarin a hriat thu leh fimkhur taka theihtawp chhuah zel a ṭul thu a sawi.

Meeting chuan, department-in tun dinhmuna project a ruahmante ennawn a, a pawimawh dan indawt deuha bawhzui an rél a; Hunthar-Vaivakawn inkar te, Lunglei College Veng te, Phullen leh Khawzawla lei tlahniamte chu kuminah ngawrh zawka buaipui ni se, an ti.