Mizoram-Assam ramri chinfelna turin HSA-in Boundary Commission din an phût

Hmar Students' Association (HSA) Gen. Hqrs chuan November 1, Pathianni zan khan Churachandpur thlen hma, Muallian petrol pump-ah Mizoram aṭanga tuialhthei leh gas phur tura kal driver-te an lo hmuak. HSA chuan, Mizoram leh Assam ramri tihchian a nih theih nan Boundary Commission din turin sorkar laipui an phût a ni.

NH kawngpui dan pina ei leh bàra inhrêk chu dan kalh a ni tih tarlangin HSA chuan, "IPC 1860, National Highways Act 1956 leh Railways Act, 1989-te bawhchhiatna a nih avangin sorkar laipui inrawlh thuai turin kan phût," an ti.

HSA chuan, Mizoram leh Assam ramri buaina chinfel a nih thei nan Supreme Court kaihhruaina hnuaiah Boundary Commission din ngei turin an phût nawn tih an sawi a; Bengal Eastern Frontier Regulation Act, 1873 hnuaia demarcation siam anga Mizoram leh Assam ramri chinfel a nih thei nan hma la turin an ngen tih an sawi bawk.

HSA Gen.Hqrs vice president Simon L Infimate chuan 'Zo hnahthlakte chhûl khat chhuak, unau kan ni' tih lantir nan Mizoram driver-te hnenah ei leh in tur bakah, ṭanpuina sum a hlân a; Mizoram truck driver-te chu Manipur-a an chàm chhungin harsatna an nei a nih chuan ṭanpui an inhuam reng thu a sawi.

Mizo driver-te Muallian petrol pump-a hmuahnaah hian inkhawm tawi buatsaih a ni a, HSA secretary (Public Relations) George F Tuollai chuan, Zo hnahthlakte chu political/geographical boundary-in min ṭhen hrang mah se, chhûl khat chhuak, thisen hmun khat an ni tih sawiin, "Tu mah inen hrang tur kan awm lo a, thinglungah kan inpawh em em a ni," a ti.

George F Tuollai chuan, Mizoramin harsatna a tawh mek chu HSA-in pawi a ti tak zet tih sawiin, "Mizoram, Manipur, Assam leh India state danga cheng Hmar mipuite'n Mizorama kan unaute nen thu hmunkhat vuanin kan ding tlat a, ramri buainaah hian engtik lai pawhin ṭanpui kan inhuam reng a ni," a ti bawk.