Covid-19 lêng vangin buhfaiah harsatna a awm rih lo - FCSCA Minister
Food, Civil Supplies & Consumer Affairs (FCSCA) minister K Lalrinliana chuan, Covid-19 thawh hnihna thleng mek avangin buhfai phurh luh kawngah harsatna a la awm rih loh thu a sawi.
Vanglaini palai zawhna chhangin FCSCA Minister chuan, dan pangngaiin buhfai leh gas phurh luh reng a nih thu a sawi a, "Chutih rualin, fûr lo thleng turah harsatna kan tawh lohna atan national highway-in a paltlang loh kudamahte buhfai chhêk khâwl nasat a ni a, thla ruk tla turte chhêk khawl a ni. Hei vang hian tun thlaah Aizawl tan ration buhfai kan pek chhuah har deuh phah," a ti.
K Lalrinliana chuan, kuminah kawng laih avangin kum dang aiin fûr dáwn avanga buhfai chhêk khâwl a tam thu sawiin, "National highway (NH) tam tak laih mek a ni a, hengte hi fûr hmain an siam zo hman dawn lo. Chuvangin, fûr a thlen huna heng kawngin a paltlang khuate'n buhfaiah harsatna an tawh loh nan kan chhêk a ni," a ti a, a ṭulna hmunah chuan buhfai an chhêk khâwl ṭhat tawh thu a sawi.
State páwna buhfai phur tur lirtheiah harsatna an tawh loh thu sawiin Minister chuan, "Lirthei khalhtute hi an fimkhur khawp a, hripui an vei lohna atan theihtawp an chhuah. Health Minister hmalaknain tun thla khan lirthei khalhtu leh an handyman-te a hlâwm deuhin Kolasib-ah Covid-19 vaccine pek an ni. Mizoram sorkarin SOP a siamte ṭha takin an zâwm turah kan ngai," a ti.
Buhfaiah harsatna thleng palh thei a awm thu sawiin K Lalrinliana chuan, "Open Market Procurement (OPM)-a kan lei ṭhin ṭhenkhat hi Prime Minister-in May leh June free ration pek a tih avangin FCI-in an hauh deuh vek emaw aw kan ti a, a nih chuan rate-ah harsatna min siam dawn," a ti a; OPM hmanga buhfai a lei theih loh chuan buhfai leina atan nasa takin senso a tam tur thu a sawi a ni.