Delhi-a Covid-19 vei enkawl nan Mizoram House hman a ni dawn

Delhi Vasant Vihar-a Mizoram House hall chu Covid-19 vei damlote enkawl nan leh ICU anga kalpui theih turin hman a ni dawn.

Hemi chungchang hi chief minister Zoram­thanga chuan nimin khan Instagram-ah a tarlang a; "Mizo mipui Covid-19 hri avanga Delhi-a harsatna tâwk mekte ka rilruin ka vei che u a, ka hre reng a che u. Vasant Vihar Mizoram House hall hi Mizo Covid natna avanga damlote dahna/ chawlh hahdamna turin ICU anga function thei turin Mizoram sorkar chuan hma a la nghal dawn," a ti.

Mizoram House chu theihtawpa lo cheibáwl turin Chief Minister chuan Mizo Welfare, Delhi member-te leh sorkar official-te a chah a; Delhi-a awm Mizo doctor leh nurse remchang theite chu a ṭul anga an thiamnate lo hmang ṭangkai tur leh bul lo ṭan turin a ngen bawk.

CM Zoramthanga chuan, "Mizo mipuite tan theihtawp kan chhuah zel ang. Tun hi kan vaia kan ṭan rual hun a ni e," a ti.