Kum 10 chhungin mi 61,106 an thi Mitthi zinga 38,624 (63%) mipa an ni

Economics and Statistics department chhinchhiah danin, kum 10 (2010-2019) chhungin Mizo­ramah mi 61,106 an thi a, chung zinga 38,624 (63%) chu mipa niin, 22,482 (27%) chu hmeichhia an ni.

Kum 10 chhung hian mipa thi an tam ber ṭum chu kum 2012 niin, 4,135 an thi a; hmeichhe thi an tam ber kum 2019-ah 2,554 an thi. Kum 10 chhung hian kum tin hmeichhia aiin mipa 1,000 aṭanga 2,000 velin an thi tam zawk ziah a; chawhrualin, mipa 1,000 an thihin hmeichhia 582 an thi anga chhût a ni.

Kum 10 chhunga thi zingah kum 70 chung lam an tam ber a, 24.5% a ni a, a dawtah chuan kum 35-44 inkar tam berin 17% an ni. Kum 35-44 inkar thi zingah hian 2,108 (27%) chu hmeichhia niin, 5,845 (73%) chu mipa an ni.

Kum bithliah hrang hranga hmeichhe thi tam ber chu kum 70 chung lam an ni a, chu chu 31.5% a ni.

Natna thih tampui zualte chu - natna inkài chhàwn theih chi 16.6%, chaw kawng lam natna 15.2%, chuap lam natna chi hrang hrang 14.1%, lung leh thisen zám natna 14% leh cancer 10.8% a ni.

Vanglaini palai zawhna chhangin Eco­nomics & Statistics direc­tor mawhphurhna la mektu B Lalrinhlua chuan, kum 2020-a nau piang leh mitthi zat an la peih loh deuh thu a sawi a, "Record tichhuak turin Ministry of Home Affairs (MHA) phalna neih a ngai a, tunah hian MHA nen inbe pawpin, report kan buaipui mek," a ti.