Dy Speaker-in Thinglian ram kâng a tlawh

Assembly deputy speaker Lalrinawma chuan nimin khan a bial chhunga ram kâng nasa tak tuartu Thinglian khua a tlawh a, an harsatna tawh dante enin, Thinglian leh Mizoram hmun hrang hranga kângmei chhuak vanga harsatna tâwkte a tawrhpui thu a sawi.

Deputy Speaker chuan, ṭhál lai a nih avangin kângmei chhuah awlsam lai a ni tih sawiin, "Kângmei chhuak thei laka kan invèn theih nan mipui kan fimkhur a ṭul a ni," a ti a; Thinglian ram kâng ṭhelh tura sorkarin hma a lâknaah lawmthu sawiin, "Thinglian khuaa kângmei chhuak mek hi sorkar hmalaknain helicopter hmanga ṭhelh a ni," a ti.

Lalrinawma hian kâng ṭhelh nan tui litre 12,000 a pe tawh a, nimin khan kângmei ṭhelha hnatlangte ei leh in senso atan Rs. 5,000 a pe leh a; Environment, Forest & Climate Change department-in DC kaltlangin tui litre 12,000 an pe tawh bawk.

Thinglian khaw ram hi April 21, 2021 khan a kâng ṭan a, ṭhelh tumin theihtawp chhuah mah se, nimin thleng khan an la ṭhelh mit lo nia tarlan a ni.