ASF vangin vawk 1,473 a thi tawh

Lunglei district-a Lungsen khuaah March 21, 2021-a vawk a thih aṭangin Mizoram hmun hrang hrangah African Swine Fever (ASF) vangin nimin thleng khan vawk 1,473 a thi tawh. Hetih lai hian, a chhan finfiah loa vawk thi 361 a awm bawk.

AH&Vety department chhinchhiah danin, ASF hi district pali - Aizawl, Lunglei, Serchhip leh Lawngtlai district-a khua/veng 13-ah a léng mek. Chu'ng khua/vengahte chuan vawk 1,473 thi tawhin, vawk vulh dam lai 4,208 a la awm. Nimin bikah chuan ASF avangin vawk 23 a thi a ni.

Hetih lai hian, khua/veng 27-ah chhan hriat loa vawk thi 361 a awm tawh a, nimin bikah chhan hriat loa vawk thi hi 58 a awm. Chu'ng khua/vengahte chuan vawk la dam 7,793 a awm a ni.