AMC councillor-te'n Covid-19 do nan thla khat hlawh zatve an thawh dawn

Health minister Dr R Lalthangliana hoin Aizawl Municipal Corporation (AMC) councillor leh Aizawl City Area Local Council hruaitute'n nimin khan HME conference hall-ah Covid-19 laka Aizawl a him theih nana hmalak ho dan tur an sawiho. Aizawl mayor Lalrinenga chuan, councillor-te'n Covid-19 dona atan thla khat hlawh aṭangin a zatve an thawh dawn thu a sawi.

Health Minister chuan, Covid-19 vei enkawl mek zinga 75% chu Aizawl district-a mi an nih thu sawiin, "Covid-19 hi inkài chhâwn a awlsam tawh hlea a lan bakah, positive kan neihte pawh a hma ai khan an dam chak lo sâwt hle niin a lang. Kan hma lam hun hi thlir thiam a har tawh em avangin nasa lehzuala ṭan kan lâk a ngai," a ti.

Aizawl khawpui enkawl tura thlan chhuah councillor-te leh local council hotute chu Covid-19 donaah an pawi­­mawh thu sawiin R Lalthangliana chuan, "Kan dinhmun dik tak hmaichhana sawiho hi a ṭul," a ti a; councillor leh LC-te chu Aizawl venghim tura mawhphurhna pawi­mawh tak chelhtute an nih avangin theihtawp chhuaha ṭan la turin a ngen.

Dr Thangtea chuan, tuna Mizoram dinhmun chu a mangan­thlak hle tih sawiin, inkhuahkhirhna pawh kalpui zel turin a ṭul dan anga ngaihtuah a ngai dawn tih a sawi.

Medical Operational Team (MOT) chairman Dr ZR Thiamsanga, MLA chuan, Covid-19 bei tura ṭan mar zual a ngaih thu sawiin, "CCC leh quarantine centre-te a khat chak em em a, positive an pun chak bakah symptom nei an tam sawt hle. Community quarantine centre leh community covid care centre siam belh zel a la ṭul dawnin a lang," a ti.

Dr ZR Thiamsanga chuan, Covid-19 dona atan sorkar hnathawkte'n an hlawh thawh leh turin MOT-in sorkarah rawtna an thlen thu a sawi a; MLA-te pawhin an hlawh aṭangin 10% an thawh leh dawn thu a sawi bawk.

Mayor Lalrinenga Sailo chuan, councillor-te'n an bial ṭheuhah theihtawp an chhuah ṭhin thu sawiin, "Kan thla khat hlawh aṭangin 50% chu Covid-19 dona atan kan thawh dawn. AMC Employee Welfare Association member-te pawhin ni khat hlawh thawh an tum," a ti a; Covid vaccine sem kawnga hmalakna atan AMC-in Rs. 2,00,000 an thawh tawh thu a sawi.

Lalrinenga Sailo chuan, sorkarin CCC leh quarantine centre a siam bakah, community quarantine centre leh hotel quarantine facility siam belh a nih hnuah hnawmhnawk (COVID waste) senghawi tur a tam zual thu a sawi a, "Awmze nei leh mumal zawka Covid-19 waste-te paih a nih theih nan ruahmanna kan siam mek," a ti.

AMC councillor-te chuan, Covid-19 donaa an hmalaknate leh harsatna awm theia an hriat te, rawtna an neihte an sawi a; chu'ngte chu a theihna ang anga bawhzui a nih tur thu Health Minister chuan a sawi a ni.