Sorkarin ngaih pawimawh tur a hre lo, Mipuiin an tawrh phah nasa - MPYCC

Mizoram Pradesh Youth Congress Committee (MPYCC) chuan thuchhuah siamin, Covid-19 hripuiin nasa taka mipui a tibuai mek a, Mizoram sorkarin ngaih pawimawh tur a hriat loh avangin mipuiin an tawrh phah nasa niin an tarlang.

MPYCC chuan Covid-19 lêng karah sorkarin mipui tana ngaih pawimawh hmasak tur damdawi-in tih changtluna oxygen hmanna tur hmanraw tam zawk dah leh ventilator tam zawk dah belh a ngaihthah hle tih an tarlang a, "District hospital tihchangtluna khum dah belh leh ICU district tina dah a ngaihthah avangin hripui thawh hnihna avangin Mizoram mipui hi harsatna rapthlak tak hmachhawn thei dinhmunah kan din phah mek a, a pawi tak zet a ni," an ti.

Dinhmun derthâwng taka Mizoram leh mipui an awm mek tih sawiin MPYCC chuan, "Chutih lai chuan sorkarin an duhsak zawngte sum siamna tur airport cute ber siam te, stadium siam belh te, hall sakte velah erawh hma an la chak hle. An duhnaah mi hausa tawh sate tihlen belh nan an MLA ni laite tiamin PAHOSS-ah cheng vaibelchhe tél an luan raltir thei a ni," an ti a; MNF hruai sorkar chu mipui mamawh ngaih pawimawh hmasak kawnga hlawhchham chiang hleah an puh.

Congress ṭhalaite chuan, Covid-19 vanga ni tin inhlawhna buai te, lirtheia eizawng te, sumdawng dàwr khâr chunga dawr luah man leh hlawhfa man pek reng ngaite ṭanpui turin sorkar a pên chhuak duh lo tih sawiin, "Vawi duailo Larsap leh CM hnenah harsa zualte ṭanpuina pe turin kan au tawh. Mahse, tun thlengin CM hian a ngaihtuah duh lo a, Mizoram mipui tan pa chan a chan ngam lohzia a tilang a ni," an ti.