KHAWTHLIR

ZMC-a non Covid-19 ward-ah positive hmu

Zoram Medical College (ZMC) a Covid-19 vei ni lote enkawlna hmun (non Covid-19 ward) lamah nimin khan Covid-19 positive hmuh chhuah an ni a, he mi kaihhnawiha mite test nghal niin mi pasarih an positive a, Surgical ward pawh khar nghal niin Vanglaini chuan thu a dawng. Hetihlai hian thu chiang zawk hriat tuma zawh belhna chu ZMC hotute chuan an chhang thei hrilh lo thung a ni.

Thisen pe
ṬKP, Edenthar unit, Lunglei chuan nimin khan Civil Hospital, Lunglei blood bank-ah thisen unit 16 an pe a, petute mipa 14 leh hmeichhia pahnih an ni. ṬKP, Lawngtlai Bethel unit pawhin District Hospital tan thisen pein, mipa pakua leh hmeichhia pahnihte'n unit 11 an pe. Nimin vêk khan Champhai College NSS chuan District Hospital-ah blood group O leh A an mamawh zual avangin thisen an pe a, mipa pasarih leh hmeichhia palite'n unit 11 an pe a ni.

Police lirthei
Mizoram Police Welfare Society chuan tuialhthei phur turlirthei (oil tanker)pakhat leh eirawngbawlna gas phur tur lirthei pakhat an lei a, April 27, Thawhlehni khan Police Headquarters a thleng.

Conference hall
Mizoram DGP SBK Singh chuan April 27, Thawhlehni khan Police Headquarters-a DGP conference hall hmasa ber a hawng. DGP conference hall hi mi 44 ṭhut theihna a ni.

Home leh FCSCA
Mizoram sorkar chuan Covid-19 avanga inkhuahkhirhna kalpui mekah, a pangngai (full strength)-a sorkar office kal tur zingah Home department leh Food, Civil Supplies & Consumer Affairs department-te telh belh a nih thu nimin khan thu a chhuah.

VTF-te thukhawm
Kolasib DC conference hall-ah nimin khan bawrhsap Dr H Lalthlangliana kaihhruaiin Tuirial, Serlui leh Kolasib Assembly constituency chhunga village task force hruaitute an ṭhu khawm.