Covid Medical Team-in ni 7 dang Khauh taka inkhuahkhirh an duh

Covid-19 Medical Operation Team (MOT) member-te nimina an chairman Dr ZR Thiamsanga, MLA hoa ṭhukhawm chuan, inkhuahkhirhna kalpui mek May 3, 2021-a a tàwp hnuah pawh ni sarih dang khauh zawka inkhuahkhirh leh ṭha an ti.

Covid-19 MOT chuan, Mizoram dinhmun thlirin inkhuahkhirhna kalpui zel ṭulin an hria a, tuna inkhuahkhirhna kalpui mek chu khauh tâwk loah an ngai. Ni sarih dang khauh taka inkhuahkhirh leh an duh a; an duhnate chu vawiina Health Minister hoa ṭhutkhawmah an thlen dawn a ni.

Vanglaini palai zawhna chhangin Dr ZR Thiamsanga chuan, khauh zawka inkhuahkhirh loh chuan harsatna lian zawk tawh a hlauhawm tih a sawi a, "Tunah hian Covid-19 veite dahna turah harsatna a awm ṭan a, chuvangin, khauh lehzuala kan inkhuahkhirh a ṭul tak zet a, tun ang ngawt hi chu a tâwk lo deuh," a ti.

Dr ZR Thiamsanga chuan, inkhuahkhirhin a tum ber - vantlanga hri darh chhut chah chu a la hlawhtling lo tih sawiin, "Kan zalen rei tawh avangin tuna tualchhunga hri inkaite hi chu kan inkhuahkhirh hma lama thlengte pawh a ni thei ve tho," a ti a; April 20, 2021 aṭanga inkhuahkhirhna kalpuiin awmzia a neih dan chu chawlhkar khat a liam leh hnu velah a lan tur thu a sawi.

Inkhung hran hun ni sarih tih ṭhin pawh tihsei an duh thu sawiin Dr ZR Thiamsanga chuan, "Ni sarih hnuah kan chhuah zalen a, heng mite hian kâi chhâwn an nei leh nite'n kan hria. Chuvangin, a rei lo berah ni 10 tal inkhung hran theih ni se kan duh," a ti.

MOT Chairman chuan, home quarantine chu a ṭhat rualin, chhungkaw tam takin an zawh loh thu sawiin, "Covid-19 kâi home quarantine-a awmtir, an chhungkuaa hri kài leh site an awm a ni," a ti a; Mizoram dinhmun thlirin, community quarantine centre tun hma anga kalpui leh ṭul an tih thu a sawi bawk.