KHAWTHLIR

Covid helpline
Aizawl district bawrhsap Dr Lalhriatzuali Ralte chuan, Covid-19 hripui léng mekah Aizawl district mipui tan harsatna thlenna tur District Emergency Operation Centre siam a nih thu a puang. Helpline num,ber-te chu 1077 (toll free) leh 8787451776 a ni.

SRH-ah mi 76 awm
State Referral Hospital-ah nimin khan Covid-19 vei mi 10 dah luh a ni a, anni nen nimin tlai dar 5 khan hripui vei mi 76 enkawl mek a ni. SRH-ZMC Bulletin tarlan danin, mi 76 zinga pakua chu ventilator nen enkawl mek an ni a, chu'ngte chu ICU-a awm mi pasarih leh Surgical Intensive Care Unit (SICU)-a awm mi pahnih an ni.

Dan loa zawrh khap
Lunglei district bawrhsap Kulothungan A chuan nimin khan thupek chhuahin, Lunglei district-ah phalna nei loa petrol, diesel leh gas zawrh khap a nih thu a puang. Thupek hi thla hnih awh tur a ni a, bawhchhiate chu IPC Section 188 hmanga hrem theih a ni.

Containment area
Khawzawl DC Zothanmawia chuan Khawzawla Tourist Lodge chu Covid-19 vei enkawlna hmun atan hman a nih avangin, Lungverh Complex chu containment area-ah a puang. Medical duty, security duty leh DC-in phalna a pekte tih loh chu luh leh chhuah phal a ni lo.

Ruang hawpui
April 27, 2021-a Covid-19 vanga Delhi-a thi Lalhlunpuii (31), Kanghmun South ruang chu lirthei hmangin Mizoram panpui mek a ni a, Covid-19 positive a nih avangin a ruang hi thlawhtheihnaah phurh theih a ni lo. April 28 zinga Delhi-a thi, Delhi West KṬP leader Zothantluanga, Hnahlan ruang erawh chu nimin khan Delhi aṭangin thlawhtheihna hmangin Mizoram panpui a ni thung.

Tlawh phal lo
Bilkhawthlir North Village Task Force chuan, Mizoramah Covid-19 a hluar zel avangin Serlui-B Hydel Project tuikhuah leh tourist lodge chu phalna bik nei lo tan tlawh an khap thu an puang.