Governor-in BCM hruaitute a kâwm

Governor PS Sreedharan Pillai chuan nimin khan Baptist Church of Mizoram (BCM) hruaitute Raj Bhavan-ah a kâwm a, Covid-19 do chungchang a sawipui.

Governor chuan BCM hruai­tute chu an kohhran mite tana Covid-19 léng laka himna tura an hmalaknate chhunzawm zel turin a ngen a, "Sorkar, kohhran mite leh tlawmngai pawlte hmalakna avangin Mizoram dinhmun chu India ram hmun dang lakah chuan a la ziaawm a, mahse inthlahdah a thiang lo," a ti a; nasa zawka ṭan lak hun leh fimkhur inzirtirna kalpui hun a nih thu a sawi.

Mizoram mipui chu Pathian ṭih leh mahni inthununna nei ṭha tak an nih thu sawiin Larsap chuan, "He hri léng donaa mi­puiin sorkar an thawhpuinaah hian a lang chiang em em. Hei hi Mizoram himna chhan pawh ni berin a hriat," a ti.

Governor chuan, damdawi-inte a lian tâwk lo tih sawiin, "Hmanruate pawh hmun dang angin a awm ṭha tâwk lo a, thawktute pawh an tam tâwk lo. Kan himna ber tur chu lo invên leh kan theih chin apianga theih­tawpa fimkhur a ni," a ti bawk.

Inkawmnaah hian BCM president Rev. Dr V Laldingliana, president hlui Rev. Dr K Lalrinthanga leh Aizawl area executive secretary Rev. Dr R Lalthanmawia te an tel a ni.