Delhi-ah hripui vei Mizo an awm nual Damdawi-inah mi panga an awm?

India rama Covid-19 darh nasat berna zinga mi Delhi-a Mizo awm mek zingah Covid-19 vei an awm nual a, hriat theih chinah damdawi-inah mi panga an awm.

Vanglaini palai zawhna chhangin Delhi Mizo Welfare, (DMW) hruaitute chuan, Delhi-ah Covid-19 a darh nasat avangin Mizote pawh an him bik lo tih an sawi a, "Engzat chiah nge Mizo zingah Covid-19 vei kan hre thei bik lo a, an awm nual tih erawh kan hria. Kan boruakin a zir loh avangin, hripui vei zat hre turin hmalak hleih theih a ni bik lo. Inah kan tawm deuh tawp a ni," an ti.

DMW hruaitute chuan, an hriat theih chinah Covid-19 avangin Mizo panga damdawi-inah an awm mek tih sawiin, "Kan hriat dan chuan dinhmun hlauhawm taka ding chu an awm lo. Hmanni deuh khan serious deuh hlek pakhat kan nei a, tunah chuan a ṭha tawh a, damdawi-in erawh a la chhuahsan lo," an ti a; Mizo zingah Covid-19 vei damdawi-in awm duh, chang si lo an awm nual thu an sawi.

Damdawi-in indaih lohna avangin Mizo Covid-19 veite chu in lamahte an inenkawl ber thu sawiin DMW hruaitute chuan, "A hminga hruaitu nih chuan a hrehawm duh khawp mai. Theihtawpa han puihte pawh an châkawm viau a, kan dinhmunin a zir rih si lo. Kan boruakin a zir loh piah lamah, Covid-19 veite chu natna dang anga han bâwihsàwm ve bawrh bawrh chi a ni lo," an ti.

Delhi khawpuiah hian Mizo 3,000 vel an awm thu sawiin DMW hruaitute chuan, "Engzat chiah nge kan nih hriatthiam a harsa. DMW-a rawn inziak lut kher lo, harsatna an tawha an awm tih kan hriat chauhte an awm ve leh ṭhin. Covid-19 avangin mi eng emaw zat an haw chho a, a ziaawm hnua rawn kîr an awm rualin, kîr tawh lo pawh an tam," an ti a; hripui a darh zual leh hnuah eng emaw zat chu an haw leh tawh thu an sawi bawk.

Ministry of Health & Family Welfare-in nimina an tarlan dan chuan, Delhi-ah hian Covid-19 vei mi 1,03,424 an awm mek a, Covid-19 vanga thi tawh zat chu 15,377 an ni. Hripui vei an tam avang hian oxygen indaih lohna a nasa a, damdawi-in pawh an inchan lo nasa hle a ni.