Phawngpui tláng a kâng mek

Mizoram tláng sáng ber Phawngpui tláng leh a chhehvel ram, April 28, Nilaini aṭanga kâng chu a bul hnaia khaw mite‘n ṭhelh tumin bei mah se, nimin tlai thleng khan ṭhelh mih a la ni lo.

Sangau aṭanga thu dawn danin, Phawngpui National Park huam chhung hi Nilaini aṭang khan a kâng a, a kan ṭanna chu Lungpher South ram aṭangin a ni. Nilaini zan khan South Lungpher YLA member-te leh EFCC department-a thawkte‘n tlaivarin an buaipui a; kângmei chhuahna lai chu awihpang leh khàm khawkrawk hmun a nih avangin chet a harsa tih an sawi.

Hetih lai hian, Phawngpui tlang lâwn chhohna Fárpak hnuai, Sangau ram pawh zan thum leh ni thum a kâng tawh a, Sangau khawtlangin ṭhelh tumin an buaipui mek zel a ni.

Bialtu MLA H Biakzaua chuan kâng ṭhelh hna thawktute ei leh in senso atan Nilaini zan khan Sangau khawtlang hruaitute hnenah Rs. 5,000 a hlân a ni.