KHAWTHLIR

Lunglei DC chuan thupek chhuahin, tunlaiin Mizoram chhehvelah vawk natna Porcine Reproductive and Respiratory Syndrome (PRRS) leh Classical Swine Fever a la léng meka hriat a nih avangin, an district-ah hmun dang ṭanga vawk lak luh leh vawk hrisel lo talh a khap. Thupek hian thla hnih chhung a huam ang.

Millennium Centre Authority chuan, Millennium Centre tlawhtu leh basement parking-a lirthei dahtute chuan Sulhnu app hmanga building luhka tin leh parking entrance-a QR code-ah scan hmasa zel tawh turin an ngen. He ruahmanna hi kalpui ṭan nghal a ni ang.

Tun hnaia Mizoram-Assam ramria buaina thleng hrang hrang chungchangah, chak zawka hmalak a nih theih nan Mizo Students Union (MSU) General Headquarters chuan October 31, 2020 khan Vairengte Police Station-ah first information report (FIR) an thehlut. FIR hi MSU president Vanlalliana Khiangte hminga thehluh a ni.

Silchar Mizoram House-a Mizo driver tangkhang mekte ṭanpuina atan Serlui bialtu MLA Lalrinsanga Ralte chuan Rs. 20,000 a pe a; Kabuganj leh Silchar-a hnam dang sumdawng ṭanghote'n Rs. 25,000 leh Dawrpui Branch YMA-in Rs. 10,000 an pe bawk. MLA hian Silchar Mizoram House-a Dy. Resident Commissioner kaltlangin a pe a, Kabuganj leh Silchar-a sumdawngte chuan driver-te hnenah an pe a, Dawrpui YMA chuan Silchar Branch YMA kaltlangin an pe thung.

State Referral Hospital-ah nimin khan Covid-19 vei mi pahnih dah luh a ni a, anni nen SRH-ah hripui vanga enkawl mek mi 74 enkawl mek an ni. SRH-ZMC Bulletin tarlan danin, mi 74 zinga paruk chu ICU-ah enkawl an ni a, mi dang zawng Isolation ward-ah an awm. ICU-a awm paruk zinga pahnih chu ventilator hmantir an ni a, mi dang pali chu oxygen pek an ni. Ward-a awm zingah ngaihtuahawm an awm lo.