Lungleiah Covid-19 chungchang sawiho

Health & Family Welfare (HFW) minister Dr R Lalthangliana hoin nimin khan Lunglei DC conference hall-ah sorkar hotute'n Covid-19 chungchanga hmalakna leh mamawhte an sawiho.

Dr R Lalthangliana chuan, Covid-19 léng thawh hnihna chu India ramah nasa taka a hluar thu sawiin, "Mizoramah pawh Covid-19 positive hmuh chhuah ni tin a pung zel a, zual lam a pan zel avangin mipui kan fimkhur lehzual a ṭul," a ti.

Lunglei district-a khua/veng khaw hrang hrangah village task force-te an che chhuak mek chu lawmawm a tih thu sawiin R Lalthangliana chuan, "VTF-te mamawh leh ruahmanna siampui ngaite kawng engkimah district task force-te'n lo ngaihvenpui ang che u," a ti a; Lunglei district mipui chu fimkhur lehzual turin a chah.

Civil Hospital, Lunglei hotute chuan, swab sample endikna TrueNAT Quattro (vawi khata sample pali test rual theih) pakhat chauh a awm thu an sawi a; technician indaih lohna avangin duh angin sample endik a kal chak theih loh thu an sawi bawk. An thu thlente chu Health Minister chuan Health department-in an ngaihtuahsak nghal tur thu a hrilh.

Ṭhutkhawmah hian Lunglei HPC vice chairman Lawmawma Tochhawng, MLA, bawrhsap Kulothungan A, SP Rex Zarzoliana Vanchhawng, chief medical officer Dr LC Liana leh District Task Force member-te an tel a ni.