Covid veite enkawl nan Mizoram House hman turah enkawltute'n thu la dawng lo

Delhi Vasant Vihar-a Mizoram House hall chu Covid-19 veite enkawl nan leh ICU anga kalpui theih tura hman tura ruahman a nih thu chief minister Zoramthanga'n Instagram-ah a tarlang tawh a; hemi chungchangah hian Mizoram House enkawltute chuan nimin thleng khan thu dawn an la nei lo thung.

Delhi Mizoram House enkawltute chuan, Mizoram House hall cheibâwl dan turah thu dawn an la nei lo tih sawiin, "GAD lamin order an buaipui mekin kan hria a, order kan hmuh hma chuan engtin nge hma kan lak dawn kan hre thei lo," tiin nimin chhun khan Vanglaini palai zawhna an chháng a ni.

Covid-19 a darh nasat avanga Delhi-a oxygen leh damdawi lam hmanraw dangte a indaih lo a; Mizoram House chu ICU anga kalpui theih a nih an rin leh rin loh zawhna chhangin thawktute chuan, "Hemi chungchangah pawh hian ruahmanna an lo siam turah kan ngai," an ti.

General Administration (GAD)-a thawkte pawhin Covid-19 veite enkawlna atana Delhi Mizoram House buatsaih tur tih chu official-in an la hriat loh thu nimin tlai khan Vanglaini palai zawhna chhangin an sawi bawk.

Delhi-a Mizo awm, Covid-19 veite enkawlna atan Mizoram House hman a nih tur thu hi CM Zoramthanga chuan April 28, Nilaini khan Instagram-ah a tarlang a, „Mizo mipui Covid-19 hri avanga Delhi-a harsatna tâwk mekte ka rilruin ka vei che u a, ka hre reng a che u. Vasant Vihar Mizoram House hall hi Mizo Covid natna avanga damlote dahna/chawlh hahdamna turin ICU anga function thei turin Mizoram sorkar chuan hma a la nghal dawn,“ a ti.

Vanglaini thu dawn danin, Delhi Mizoram House-ah hian Mizoram sorkar chuan Covid-19 lên hma aṭangin doctor leh nurse pakhat a dah. Delhi khawpuiah hian Mizo nurse eng emaw zat an awm a, mahse, damdawi-in a thawk lai an ni hlawm.