SRH-ZMC-a awm mek zingah Covid-19 vei mi 7 hmu chhuak

State Referral Hospital/Zoram Medical College-a thawk leh damlo awm mek zingah April 28, Nilaini khan Covid-19 vei mi pasarih hmuh chhuah a ni. Hetih lai hian, SRH-ZMC-a damlo dang (Covid vei ni lo) awm mekte chu sorkarin damdawi-in dangah sawn chhuah a tum.

Nimin zinga sorkar thu­chhuahin Nilainia swab sample test result a tihchhuaha a lan danin, SRH-ZMC-a awm mek Covid-19 vei hmuh chhuahte chu, thawktu mi pathum, damlo pahnih leh damlo awmpuitu pahnih an ni.

SRH-ZMC-a thawktu hripui vei hmuh chhuah pathumte chu doctor pakhat, Nursing Superintendent leh 4th grade pakhat an ni a; hripui vei mekte nen inkungkaihna nei veka ngaih an ni.

Covid-19 vei vanga awm ni lo, taksaa harsatna/ natna dang neih vanga damlo (non-Covid patient) SRH-ZMC-a awm mek zinga pahnihin Covid-19 an kái tih hmuh chhuah a ni a; non-Covid patient awmpuitu mi pahnih dangin hripui an vei tih hmuh chhuah a ni bawk.

SRH-ZMC-ah hian Covid-19 vei ni lo, damlo dang eng emaw zat an awm mek a, chu'ng damlote chu damdawi-in dang­ah sawn chhuah tum a ni.

Vanglaini palai zawhna chhangin Covid-19 Medical Operation Team chairman Dr ZR Thiamsanga chuan, SRH-ZMC-a Covid-19 vei ni lo, damlo dang awmte chu damdawi-in dangah sawn chhuah vek tum a nih thu a sawi a, "Vawi leh khatah sawn chhuah vek theih a ni lo a, an awmna tur damdawi-in dangte buaipui a ngai a, sawn chhuak vek tur chuan hun a duh deuhin a rinawm," a ti.