PHE Minister hoin tui harsatna sawiho

Public Health Engineering (PHE) minister Tawnluia, deputy chief minister hoin nimin khan CS conference hall-ah PHE department hotute‘n video conference kaltlangin tun hnaia tui harsatna chungchang an sawiho.

Tawnluia chuan, tuna dinhmun dik tak report aṭangin hmalak dan tur duan a nih tur thu sawiin, "Tui kang avangin thingtlang leh khawpuiah harsatna kan tâwk mek a, khawkhéng avangin harsatna tam tak kan neih karah, ni danga chhuak ngai lo kângmeite a chhuak a, leilung hausakna kan chán nasa a ni,“ a ti a; Emergency Water Supply pawh bawhzui turin hmalak belh a nih dawn thu a sawi.

Ṭhál laia Aizawla tui harsat chhan zirchianna tarlan a nih dan chuan, December 2020 chawhnu lam, Krismas hma aṭangin thlasik a ná a, mipui power supply mamawhna pungin Krismas hma deuh aṭangin Aizawl tui pump-na Luangmual aṭanga power supply laknaah load shedding a awm ṭhin.

Tarlan danin, April 26, 2021 khan GAWSS Phase-I hmangin tui pump hleih theih a ni lo a, Serlui chu April 28, Nilainia an tehnaah tui litre nuai 18 a awm a, tui pump chhuah turin a tlem hlea ngaih a ni.

GAWSS Phase-II in tui a pump chhuahnaah tui a kám a, April 25-ah cm. 14.57-in a tlahniam a, April 26-ah cm. 16 leh April 27-ah cm. 22-in a tlahniam leh a; nimin zing dar 8 khan cm. 26.75-in tui a kám leh bawk.