AMC-in vawk thi tuamna tur pe

Aizawl Municipal Corporation (AMC) hotute chuan nimin khan African Swine Fever (ASF) vanga vawk thite tuamna tur Animal Husbandry & Veterinary Board vice chairman C Lalmuanpuia, MLA hnenah an hlân.

C Lalmuanpuia chuan, ASF vanga vawk thite phûmna hmun tur Aizawl Mayor hmalaknain ngaihtuah a nih thu sawiin, "AMC-in an ram a thlàwna min hmantir dawn avangin kan lawm tak zet," a ti a; harsatna thleng leh thei turah pawh thawhpui turin AMC hotute a sáwm a ni.

AMC deputy mayor R Thanglura chuan, "Vawk thite ruang tuamna tur hi ṭawih theih a nih avangin ram leilung tan pawh a him. Vawk phûmna turah hian veng ṭhenkhatin an remtih loh avangin harsatna kan tâwk deuh," a ti.

Thilpek inhlanna hunah hian AMC aṭangin executive councillor B Lalawmpuii, AH&Vety Director leh official dangte an tel a ni.